‘Divê hêzên navneteweyî guh bidin daxwazên pêkhateyên herêmê’

Şêniyên kantona Cizîrê nebersivandina daxwazên wan ên bidawîkirina tecrîda li ser Rêber Abdullah Ocalan û dewamkirina cezayên dîsîplînê, şermezar kir û hêzên navneteweyî wek şirîkên dewleta Tirk bi nav kir. Her wiha gotin divê hêzên navneteweyî rêzê ji daxwazên pêkhateyên herêmê re bigirin.

ROJANE

1 hezîran, 2024 03:05

QAMIŞLO

RÊNAS RIMO-EBAS XELEF

Dewleta Tirk a dagirker ji 25`ê Adara 2021`an ve, ferzkirina cezayên dîsîplînê li ser Rêber Abdullah Ocalan didomîne. Herî dawî, bi hinceta van cezayan qedexeya hevdîtinê heta 6 mehan dirêj kir.

Şêniyê bi navê Rêber Omer têkildarî mijarê got: "Mixabin hêzên navneteweyî hevkarên dewleta Tirk in. Tev li Komploya Navneteweyî bûn ku beriya 25 salan li dijî Rêbertî hatiye kirin. Heta îro jî wisa ye. Lê em ê jî têkoşîn û xebatên xwe li gorî ramanên Rêber Abdullah Ocalan berdewam bikin."

Şêniya bi navê Alaa Mihemed Seîd Îbrahîm jî got: "Hevdîtina bi malbat û parêzeran mafê girtiyan e. Rêber Abdullah Ocalan roleke mezin di rizgarkirina civak û jinan de lîstiye. Ji ber wê dewleta Tirk a dagirker dixwaze vîna gelê herêmê di kesayeta Rêber Abdullah Ocalan de bişikîne."

Xalid Dawûd jî bêdengiya civata navneteweyî ya li hember van sûcan şermezar kir û diyar kir ku ev bêdengî berdewama komploya li dijî gelê Herêma Bakur û Rojhilatê Sûriyeyê ye. Dawûd wiha pê de çû: "Rêber Abdullah Ocalan bi fikrên xwe yên rizgarkirinê hewl da azadiyê, edaletê û wekheviyê ji gelê herêmê re peyda bike.”

Dawûd bang li gelê Kurd kir ku têkoşînê mezin bikin û tecrîdê bi dawî bikin û azadiya wî ya fîzîkî ya Rêber Abdullah Ocalan bi dest bixin û bang li hêzên navneteweyî kir ku rêzê ji daxwazên pêkhateyên herêmê re bigirin.

(şx)

ANHA