Dîmenên xisara li mal û milkên welatiyan bûye
Nûçegihanên me dîmenên xisara ji ber topbarana hêzên hikumeta Şamê û çekdarên "Dîfa Wetenî" li mal û milkan bûye, kişandin.
Hêzên hikumeta Şamê û çekdarên "Dîfa Wetenî" ji sêşemê piştî nîvê şevê ve, ji navendên xwe yên li Meyadîn, El Bû Kemal û herêma Eşare bajarokên rojhilatê Dêrazorê topbaran dikin.
Bajarokên Zîban, Şihêl, Tiyane, Dernic, Ebû Herdûb, Ebû Hemam, El Latwa, Xiranîc û gundên derdora wan bajarokên hatine hedefgirtin.
Ji vê sibê ve, hêzên hikumeta Şamê û çekdarên "Dîfa Wetenî" ji navendên xwe yên li gundê Diwêr û Sibêxan gundên Basîra, Kişkiye, Ebû Hemam topbaran dikin û heta niha topbaran berdewam e.
Dîmenên ji gundê Sebxa û bajarokê Kişkiye yê Dêrazorê hatin kişandin, wêraniya ji ber hedefgirtina rasterast a sivîlan nîşan didin. Malek tev de ruxiyaye, kel û pelên malê tev de belav bûne, têlên kehrebeyê qut bûne, xisar li dîwar û banên malan û dikanan bûye.
Di encama topbarana ji nîvê şeva sêşemê de 13 kes şehîd bûn û 26 kes jî birîndar bûne. Her wiha 2 şervanên QSD`ê şehîd bûne û zirarên mezin li mal û milkên welatiyan bûne.
(şx)
ANHA
