Di Adarê de 48 belavkarên hişbirê hatin girtin

Hêzên Ewlekariya Hundirîn operasyonên li dijî firoşkarên madeyên hişbir didomînin. Di meha Adarê de 48 belavkar û firoşkarên madeyên hişbir hatin girtin.

Hurgiliyên operasyonan bi vî rengî ne:

2’yê Adarê 2 belavkarên madeyên hişbir li Minbicê hatin girtin û miqdareke madeyên hişbir, bombeyên destan hatin desteserkirin. Di heman rojê de 2 belavkarên din li Tebqayê hatin girtin.

8’ê Adarê Hêzên Têkoşîna li dijî Madeyên Hişbir firoşkarekî madeyên hişbir girt û miqdareke mezin a hebên hişbir desteser kirin.

14’ê Adarê Hêzên Têkoşîna li dijî Madeyên Hişbir bi kemînekê rê li ber kamyona madeyên hişbir a ji herêmên hikumeta Şamê ber bi herêmên Rêveberiya Xweser ve dihat, girt. Kamyona madeyên hişbir li gundewarên bakurê Dêrazorê hat desteserkirin û 2 berpirsên qaçaxçîtiya van madeyan hatin destgîrkirin.

Di meha Adarê de li Minbicê şebekeya 23 firoşkar û belavkarên madeyên hişbirê hatin girtin û miqdareke madeyên hişbir û çek ku li gel wan hati dîtin, hatin desteserkirin. Li Hesekê jî 14 belavkarên madeyê hişbir hatin girtin.

17’ê Adarê 4 firoşkarên madeyên hişbir li Hesekê hatin girtin û miqdareke madeyên hişbir, çek û pere hatin desteserkirin.

(bb)

ANHA