Daxuyanî bi boneya 13`mîn salvegera damezrandina Ajansa Nûçeyan a Hawarê

Di 1`ê Adara 2013`an de, di nav aloziya li Sûriyeyê û çend meh piştî destpêkirina şoreşa 19`ê Tîrmeha 2012`an li Rojava, Ajansa Nûçeyan a Hawar (ANHA) di kêliyek girîng a dîroka herêmê de hate damezrandin. ANHA bû dengek ji bo rastiyê li hember kampanyayên dezenformasyonê û platformek ji bo ragihandina rastiyan ji çavkaniyên wan ên sereke ji raya giştî re, di demekê de ku hêzên serdest teknolojiyên herî pêşketî û dezgehên medyayê bikar dianîn da ku rastiyê veşêrin, nûçeyên derew belav bikin, û hewl bidin ku cihêrengî û pirrengiyê ji holê rakin û gel bêdeng bikin.

ANHA wek bersiva pêdiviya lezgîn a ji bo medyayek azad û serbixwe ku pabendî rastiyê û doza gelên bindest e, di serî de gelê Kurd, hat damezrandin. Ji destpêka xwe ve, ajansa me, ANHA, li ser bingeha baweriya ku medya ne tenê amûrek ji bo belavkirina nûçeyan e, lê stûnek bingehîn e ya avakirina civakek demokratîk, pêşvebirina prensîbên jiyanek azad û şekildana karakterê exlaqî û siyasî yê civakê de ye, armanc kiriye ku beşdarî têkoşîna li dijî hegemonyaya medyayê bibe.

ANHA`ê di wê baweriyê de ye ku têkoşîna medyayê beşek sereke ya têkoşîna ji bo azadî, edalet û wekheviyê ye. ANHA`ê ji bo hilweşandina zihniyeta medyayê ya otorîter, ku ji civakê veqetiyaye û bi zihniyetek dûrxistin û baviksalar ve girêdayî ye, têdikoşe. Her wiha hewl daye ku nêzîkatiyek medyayê ava bike ku bi civakê ve girêdayî ye, ku hemû reng, deng, bawerî û ramanan dipejirîne û dewlemendiya wê ya çandî û civakî nîşan dide.

Di pêvajoya 13 salan de, ajansa me, ANHA, bûyer û pêşketinên li Rojava, Bakur û Rojhilatê Sûriyeyê, Sûriyeyê bi giştî û li deverên din ên Kurdistanê, Rojhilata Navîn û cîhanê, bi profesyonelî, zelalî û objektîfî şopandiye. Wê bûyerên herî girîng, ji ​​şerê li dijî DAIŞ`ê bigire heta berxwedana li dijî dagirkeriya Tirkiyê li Efrîn, Serê Kaniyê û Girê Spî, û êrişên li ser Rojava, vegot, û berxwedana şervanan, şêweyên hevgirtina gel û înîsiyatîfên civakî yên parastina rûmet û hebûna wan şopandiye.

Ajans ne tenê dezgeheke nûçeyan a bêalî bû, lê belê dengek ji bo rastiyê, hevkareke damezrandina nirxên edalet û wekheviyê de, û parêzvanek azadiya jin û ciwanan bû. Her wiha girîngiyek taybetî da mafên karker û kedkaran, parastina jîngehê, û pêşvebirina çanda pirrengî û demokrasiyê.

Ev rêwîtî ne hêsan bû. ANHA`ê ji bo ragihandina rastiyê bedelên giran da, çend karmendên wê dema ku bûyerên li qadê dişopandin şehîd bûn: Dilîşan Îbîş, Rizgar Denîz, Hogir Mihemed, Saad Ehmed, Îsam Abdullah, û Cîhan Bilgîn. Fedakariya wan dê ji bo rêwîtiya me rêya me ronî bike, û wê bimîne sozek exlaqî ji bo berdewamkirina rêya ku ji bo parastina azadiya ramanê hilbijartiye.

Di salvegera 13`mîn a damezrandina ajansa me, Ajansa Nûçeyan a Hawarê (ANHA), em spasiya şopînerên xwe yên li Rojava, Sûriyeyê, Rojhilata Navîn û cîhanê dikin, ji bo piştgiriya wan a bêdawî û baweriya wan a bi nameya me ya medyaya azad û serbixwe. Em soza nû dikin ku em li gorî dilsoziya bi şehîdên xwe re û girêdana bi nirxên ku em pê bawer in, bi profesyonelîzm û berpirsiyariya herî bilind, erkên xwe bi cih bînin, em li ser rêya rastiyê bin û medyayê bikin amûrek ji bo avakirina civakek dadperwer û demokratîk ku rûmeta mirovan diparêze û cihêrengiyê dipejirîne.

Rêveberiya Ajansa Nûçeyan a Hawarê

1`ê Adarê, 2026