Cenazeyê bijîşk Mihemed Mihemedkê spartin axê

Rêveberê Odeya Yekitiya Xebatkarên Tenduristiyê Dr. Mihemed Mihemedkê duh di dema li ser erka xwe bû ji ber krîza dil şehîd bû. Şêniyên taxên Şêxmeqsûd û Eşrefiyê yên bajarê Helebê cenazeyê şehîd Mihemed îro li Mezargeha Şehîdan a li bakurê taxa Şêxmeqsûd spart axê.

Şehîd Mihemed Mihemedkê ji gundê Bênê yê girêdayî bajarokê Şêrawa ya Efrînê ye, di sala 2015’an de dest bi karê tenduristiyê kir û bi dermankirina birîndaran beşdarî şerê gel ê şoreşgerî yê li taxên Şêxmeqsûd û Eşrefiyê bû. Du salan rêveberê Meclisa Tenduristiyê ya her du taxan bû û di destpêka sala 2020ˈan de bû rêveberê Odeya Yekitiya Xebatkarên Tenduristiyê.

Merasîm bi deqeyeke rêzgirtinê dest pê kir. Piştre hevserokê Buroya Helebê ya Têkiliyên ya Partiya Yekitiya Demokratîk ê Welîd Mamo axivî û sersaxî ji bo malbata şehîd re xwest û behsa kar û xebatên wî yê tenduristiyê kir.

Welîd Mamo anî ziman ku Şehîd Mihemed bê dudilî û bi dilpakî û dirust rêya şehîd Xalid Fecr temam kir.

Kurê şehîd Mihemed, Silêman Mihemedkî jî got: "Em bi karê ku bavaê min ji bo civaka xwe pêşkêş kirine serbilind in û bîranîna wî dê di dilê me de nemir e."

Cenazeyê şehîd Mihemed Mihemedkî di nava tilîlî û dirûşmeyên “Şehîd Namirin” de spartin axê.

(k)

ANHA