‘Bi şoreşa Rojava dê mafên hemû jinên Sûriyeyê bên parastin’

Kongra Star a kantona Firatê têkildarî êrişên dewleta Tirk a dagirker û berxwedana jinan a li dijî van êrişan, daxuyaniyek da.

Daxuyanî ji aliyê endama Kongra Star Peyman Elûş ve li Qada Jina Azad a Kobanê hat xwendin.

Di daxuyaniyê de hate gotin:

"Piştî 54 salan rejîma desthilatdar hate rûxandin. Di 19’ê Tîrmehê de bingehek demoqratîk û azad ji bo tevahî gelê Bakur û Rojhilatê Sûriyeyê, tevahî gelê heremê û ji bo jiyanek wekhev mafê tevahî pêkhateyan hat parastin û ji bo gelê azadîxwaz bû modelek nû û bû şoreşa jinê. Bi vê şoreşê re wê ev sedsal bibe sedsala şoreşa jina azad.

Bi hilweşîna sîstema Baas û aloziyên ku îro li tevahî erdîngariya Sûrî tê jiyankirin re, car din desthilatdariya dewleta Tirk û çeteyên wê êrişên xwe li ser herêma me nû dikin û dixwazin axa bi ewle dagir bikin.

Dagirker û çeteyên wê bi taybet êrişî Kobanê dikin da ku tola şikestina DAIŞ’ê hilînin. Li Kobanî ruhê netewî hatiye avakirin û îro bûye rûmeta gelê kurd. Wê careke din bi ruhê Arîn û Gelhatan li ber xwe bide û dagirkeriya dewleta Tirk û hevalbendên wê têk bibe.

Em jî wek beşek ji Sûriyeyê, ji bo ku Sûriyeyek nû bê avakirin û destûrek nû bê çêkirin û mafên tevahî pêkhateyan were parastin bi çand, ziman û nasnameya xwe jiyan bikin.

Em wek sazî û rêxistinên jin bang li jinan dikin ku di nava vê pergala me ya demokratîk de cihê xwe bigirin û projeya Bakur û Rojhilatê Sûriyeyê bibe mafê tevahî jinên Sûrî."