Bi hezaran şêniyên Cizîrê sersaxî da malbatên şehîdên berxwedana Tişrînê

Bi hezaran welatiyên ji pêkhateyên kantona Cizîrê  li bin konê sersaxiyê yê li navenda Ciwanên Şoreşger a Dêrik û Girkê Legê hatiye vedan sersaxî da malbatên şehîdên berxwedana Bendava Tişrînê şehîd Mihyedîn Omer, Mihemed Şefîq Îsmaîl û Hezna Ebdê.

Li bin konê sersaxiyê, endama Meclisa Giştî ya Partiya Yekitiya Demokratîk (PYD) Ayhan Murad axivî û diyar kir ku beşdariya xelkê Herêma Bakur û Rojhilatê Sûriyeyê di berxwedana Bendava Tişrînê de ji bo cîhanê peyamek e ku gelê herêmê rêya şerê gel ê şoreşgerî hilbijartiye.

Ayhan wiha domand: "Yektiya pêkhateyên Kurd, Ereb, Suryan û Ermen domandina fikira neteweya demokratîk e ku ji bo Sûriyeyê çareseriyeke demokratîk e."

Her wiha endamê Meclisa Malbatên Şehîdan a Dêrikê Salih Omer jî axivî û diyar kir ku bi çi berdêlê dibe bila bibe ew ê destkeftiyên şehîdên xwe biparêzin.

Omer destnîşan kir ku berdewamkirina berxwedana pêkhateyên herêmê rêbaza gihandina Sûriyeyê ber bi dewleteke demokratîk a nenavendî ku tê de hemû sûriyeyiyan hembêz bike, ye.

Di dawiyê de wesîqeyên şehdan hatin xwendin û radestî malbatên wan hatin kirin.

(fr)

ANHA