Bi boneya salvegera damezirandina PYD`ê şahiyên girseyî

Li seranserê herêmên Bakur û Rojhilatê Sûriyeyê û bajarê Helebê şahiyên pîrozkirina salvegera 22`yemîn a damezirandina PYD`ê hatin lidarxistin.

ROJANE

20 îlon, 2025 23:19

NAVENDA NÛÇEYAN

Şêniyên Herêmên Bakur û Rojhilatê Sûriyeyê û bajarê Helebê salvegera 22`yemîn a damezirandina Partiya Yekitiya Demokratîk (PYD) pîroz kirin. Di şahiyan de, soza berdewamkirina têkoşînê li ser şopa şehîdan û felsefeya Rêber Abdullah Ocalan hate dayîn.

Li kantona Firatê bi hezaran şênî li qada Şehîd Egîd a bajarê Kobanê tev li şahiyê bûn. Di şahiyê de hevserokê PYD`ê yê Bakur û Rojhilatê Sûriyeyê Xerîb Hiso axivî û got: “Li hember siyasetên înkarkirinê yên rejîma Baasê partî di şert û mercên herî dijwar de hate damezirandin. Li hember hewldanên tunekirinê bi saya fedakariyên têkoşeran û şehîdan, li ber xwe da.”

Hevserokêa Meclisa Malbatên Şehîdan Sara Xelîl jî got ev roj gelek pîroz e ji ber ku mîrasa şehîd Şîlan, mamoste Osman e.

Li Qamişloyê rêxistina PYD`ê şahiyek li Parka Azadî bi dirûşma “Bi hev re komara demokratîk a Sûriyeyê ava bikin” li dar xist. Bi sedan kurd, ereb, nûnerên civaka sivîl û partî tev li şahiyê bûn.

Di şahiyê de hevserokê meclisa kantona Cizîrê Mihemed Ebdurehîm axivî û got PYD`ê ji destpêka damezirandinê ve li hember siyasetên çewisandinê dengê berxwedanê bû û xwediyê projeya “xeta sêyemîn e” ya ku jiyana hevbeş a di navbera gelan de parastiye.

Li Amûdê jî, hevseroka kantona Cizîrê Ayhan Murad got PYD`ê di pêvajoyeke gelek dijwar û şer û qirkirina de ava bû û karî li kêleka gel xeta berxwedanê xêz bike.

Li Hesekê jî. Şahîd li Stada Komînên El Muftî hate lidarxistin. Di axaftinan de, hate gotin ku damezirandina PYD`yê li hember hewldanên tunekirina nasnameya kurdî “pêwîstiyeke dîrokî” ye û partî di serhildana Qamişlo ya 2004`an û şoreşa Rojava de, roleke mezin lîstiye.

Li Dêrik, Tirbespiyê, Til Temirê û Dirbêsiyê, şahiyên girseyî hatin lidarxistin. Di şahiyan de hate diyarkirin ku PYD`ê “partiya şehîdan e” ku li ser nirxên berxwedanê û birêxistinkirina civakî ava bûye û ber bi Sûriyeya demokratîk a nenavendî, pirreng a ku biratiya gelan ji xwe re kiriye bingeh ve, rêya xwe temam dike.

Li Girkê Legê û Çilaxayê jî şêniyan soz dan ku pabendî rêgezên partiyê bibin ji ber ku partiya mezlûman e û projeya netewa demokratîk a ku Rêber Abdullah Ocalan pêşkêş kiriye, gelên herêmê kir yek.

Li bajarê Helebê jî şahiyeke girseyî li taxa Şêxmeqsûdê hate lidarxistin. Bi sedan şênî, nûnerên partî û saziyên civaka sivîl, tev lê bûn. Di axaftinan de, hate diyarkirin ku damezirandina partiyê, li hember siyasetên qirkirinê û înkarkirinê “gaveke bi cesaret”e û dê pêşengê partî û hêzên ku hewl didin Sûriyeya demokratîk ava bikin, be.

Di şahiyan de, komên hunerî û komên muzîkê berhemên xwe pêşandan. Li ber stranên komên muzîkê xelekên govendê hatin gerandin.

PYD`ê sala 2003`yan hate damezirandin. Di 2 serdeman de, bû hêzeke siyasî û ya gel. Di rûniştandina pergala Rêveberiya Xweseriya Demokratîk de û parastina destkeftiyên gelên herêmê, roleke çalak lîst.

(şx)

ANHA

AMÛDÊ

KOBANÊ

HELEB

ÇIL AXA

DÊRIK

TIL BIRAK

TIRBESIPYÊ

HESEKÊ

TIL TEMIR

QAMIŞLO

DIRBÊSIYÊ

GIRKÊ LEGÊ