Bi boneya 4’ê Nîsan çalakiyên çandî û hunerî hatin lidarxistin

GIRBAWÎ: BAXÇEYEK HAT VEKIRIN Û ŞAHIYEK HAT LIDARISTIN

Bi boneya 4`ê Nîsanê roja rojbûna Rêber Abdullah Ocalan Nivîsgeha Jinan a Şaredariya Bajarokê Girbawî ya girêdayî bajarê Qamişlo li ser navê Rêber Abdullah Ocalan bexçyek vekir.

Bexçe ji aliyê dayikên şehîdan ve hate vekirin û tê de dar û gul hatin çandin. Piştî vekirina bexçeyê bi amadebûna şêniyên bajarokê Girbawî li ber avahiya Şaredariya Gel a bajarok pîrozbahiyek hate lidarxistin.

Di pîrozbahiyê de ji aliyê Koma Kulîlkên Girbawî, Koma Şehîd Rama, hunermend Lawîn Seyîd Yûsif ve staran hatin gotin, her wiha ji aliyê Koma Viyan Soran a Govendê govend hate pêşkêşkirin.

Pîrozbahî bi gerandina dîlanê bi dawî bû.

TEBQA: ÇALAKIYA ROJEK BI RÊBERTÎ RE

Yekitiya Jinên Ciwan li Tebqayê bi navê "Rojek bi Rêbertî re" bi beşdariya endamên yekitiyê û ciwanên şoreşger li ber keviyên çemê Firatê çalakiyek li dar xist. Di çalakiyê de semînerek li ser jiyana Rêber Abdullah Ocalan û têkoşîna wî hat dayîn, her wiha nivîsên têkildarî baweriya wan bi fikra wî hatin nivîsandin. Li kêlek wê xebatên destekariyê hatin pêşkêşkirin.

Çalakî bi daxwaza azadiya fîzîkî ya Rêber Abdullah Ocalan bi dawî bû.

HESEKÊ: PÊŞANGEHEKE HUNERÎ HAT VEKIRIN

Kongra Star û Hîlala Zêrîn bi minasebeta 4'ê Nîsanê rojbûna Rêber Abdullah Ocalan, li parka Xwendinê ya bajarê Hesekê pêşangehek vekir.

Di pêşangeha ku hat lidarxistin de hunermend, endamên saziyên Rêveberiya Xweser û gelek kes tevlî bûn.

Di pêşangehê de berhemên endamên Dibistana Hunerî ya Hîlala Zêrîn hatin pêşandan.

Rêvebera Hîlala Zêrîn ya bajarê Hesekê Nevîn Ehmed Mihemed di pêşangehê de axivî û bi xêrhatina mêvanan kir.

Nevîn Ehmed Mihemed di axaftina xwe de da zanîn ku jinên ku dilê wan ji bo azadiyê lê dide, dîroka 4’ê Nîsanê ku rojbûna Rêber Abdullah Ocalan e, tê de azadiya xwe dibîne.

Nevîn Ehmed Mihemed di berdewama axaftina xwe de anî ziman ku dîroka rojbûna Rêber Abdullah Ocalan ji bo mirovahiyê mîladek e û got: “Dîroka 4’ê Nîsanê hêvî û şewqeke mezin dide jina Kurd û em 4’ê Nîsanê li Rêber Apo, şehîdên şoreşê û li hemû jinên cîhanê pîroz dikin.”

Mamoste Canda Ebdilqadir jî got: “Em van berheman diyarî Rêber Apo dikin. Her berhemek wateyek xwe heye. Bi destê jinê tê çêkirin. Ji ber azadiya civakê bi destê jinê pêk tê.”

Pîştî axaftinan mêvanan li salona pêşengehê berhemên ku bi destê endamên Dibistana Hunerî ya Hîlala Zêrîn hatine çêkirin temaşe kirin.

Her wiha li bajarê Holê yê kantona Cizîrê şêniyan bi boneya rojbûna Rêber Abdullah Ocalan şahiyek li dar xist.

(ekîb/fr)

ANHA

Hesekê

Hol

Qamişlo

Tebqa