‘Berxwedan rêya bidestxistina azadiyê û avakirina civaka azad e’

Bi nêzîkbûna salvegera Komploya Navneteweyî ya li dijî Rêber Abdullah Ocalan, Partiya Yekitiya Demokratîk (PYD) ji bo şîrovekirina armancên komployê û pêşxistina hişmendiya li hember van armancan, dest bi lidarxistina civînan kir.

Rêxistina PYD`ê ya bajarê Tirbespiyê di vê çarçoveyê de civînek li navenda xwe ya li bajêr li dar xist. Bi dehan şênî, endamên partiyên li Tirbespiyê û saziyên Rêveberiya Xweser hazir bûn.

Hevserokê rêxistina PYD`ê ya bajarê Tirbespiyê Ebdurehmîn Hiso destnîşan kir ku Komploya Navneteweyî di şexsê Rêber Abdullah Ocalan de gelên herêmê kirin hedef û diyar kir ku hîna berdewam e.

Hiso destnîşan kir ku desthilata Tirk hem li dijî Rêber Abdullah Ocalan pergala îşkence û qirkirinê hem li dijî gelên ji bo azadiya Rêber Abdullah Ocalan tê dikoşin, ferz dike.

Hiso diyar kir ku feslefe û ramanên Rêber Abdullah Ocalan rêya azadiyê û xilasiya ji zilmê û zordestiyê ronî kir û di heman demê de anî ziman ku Rêveberiya Xweseriya Demokratîk bi saya ramanên Rêber Abdullah Ocalan hatiye bidestxistin.

Hiso îşaret pê kir ku tenê bi rêya têkoşînê û berxwedanê, rê li pêşiya siyasetên dewleta Tirk a dagirker û dewletên komploger tê girtin û got ev rê, rêya avakirina jiyana birûmet û azad e.

(şx)

ANHA