Bandora encamên qonaxa sêyemîn a Operasyona Mirovî û Ewlehiyê
Mudirê Navenda Ragihandinê ya YPG`ê Siyamend Elî mekanîzmeya koordîneya di navbera şaneyên DAIŞ`ê li kampa Holê û derveyî wê de aşkera kir. Her wiha da zanîn ku di operasyonê de hin serçeteyên DAIŞ`ê hatine kuştin, gelek çete û hevkarên wan hatine girtin. Siyamend Elî bandora encamên operasyonê li ser ewlehiya herêmê şîrove kir.
![Bandora encamên qonaxa sêyemîn a Operasyona Mirovî û Ewlehiyê](https://hawarnews.com/kr/uploads/images/202402/image_870x_65c3d21462c89.jpg)
Mudirê Navenda Ragihandinê ya Yekîneyên Parastina Gel (YPG) Siyamend Elî ji ajansa me re têkildarî Operasyona Mirovî û Ewlehiyê, encamên lêpirsînên bi kesên hatine girtin re di serî de kesê bi navê Ebû Ebid El Hemîd axivî.
Elî got: "Ebû Ebid El Hemîd di 3`yê Sibatê de di operasyoneke taybet de hate girtin. Berpirsê tundrawiyê, derxistina fetwayan, perwerdekirina zarokan, rewakirinna fetwayên terorî ye. Plansazê êrişên terorîst û zêdekirina tundrawiyê bû."
Elî wiha domand: "Ebû Ubeyde jî berpirsê ewlehiya hundirîn bû ku 27`ê Kanûna 2023`yan di operasyoneke taybet de ya hêzên me hate kuştin. Her wiha berpirsê derbaskirina çek, belavkirina wê û perwerdekirina ciwan û jinan bû, ji bo ku li dijî saziyan û kesayetan di nava kampê de û heta li dijî hêzên me, êrişan pêk bînin."
Der barê koordîneya navbera şaneyên DAIŞ`yê yên li hundirê kampê û derveyê wê de Elî ev agahî parve kirin: "Ji derveyî kampê kesê bi navê Ebû Sufyan berpirs bû. Demekê di nava kampê de bû û bi rêyekê jê derket."
Elî agahiyên din têkildarî Ebû Sufyan parve kirin: "Komkirina hejmara herî zêde ya ciwanan, pêkanîna êrişên terorîst li derveyî kampê, komkirina hejmara herî zêde ya şane, çekan û belavkirina wê li nêzî kampê. Ebû Sufyan berpirsê zêdetirî 80 bûyerên kuştinê di nava kampê û li derveyî wê de bû ku ji 2020`an ve pêk hatine. Berpirsê kuştina bi dehan ciwan û jinan di nava kampê de û têwerkirina wan di nava kortikan de."
Elî ev li gotinên xwe zêde kir: "Ji qonaxa yekemîn û duyemîn a Operasyona Mirovî û Ewlehiyê ve me dixwest Ebû Sufyan bigirin. Lê di bin navên nerast de xwe vedişart. Dema ji kampê jî derket, li herêmên El Deşîşe û li çolistanê bû."
Girêdayî detayên girtina Ebû Sufyan Elî got: "Piştî girtina bi dehan terorîstên ku bi Ebû Sufyan re êrişên terorî kirine, piştî lêpirsînê û li gorî hin agahiyan em tev geriyan û gihaştin cihê xwe lê vedişart. Di operasyoneke taybet a HAT`ê de hate kuştin. Hêzê destpêkê xwest bi saxî wî bigire, lê belê êriş hêzan kir û di encamê de hêzên me neçar man bersivê bidin û wî û kesên pê re kuştin. Di wê operasyonê de miqdarên mezin ên çek, cebilxane û madeyên teqemeniyê hatin desteserkirin."
Mîrê bûyerên kuştinê serçeteyê bi navê Mehmûd El Lehîbî yê bi navê Ebû Sufyan tê naskirin tevî kesek din di şeva 4`ê Sibatê de li malekê li ser rêya gundê Xuwêtle yê bajarokê El Deşîşe yê bajarê Hesekê ku xwe tê de veşartibû hatin kuştin.
ˊOPERASYONA MIROVÎ Û EWLEHIYÊ PLANÊN TERORÎ YÊN LI DIJÎ HERÊMÊ TÊK BIRˊ
Siyamend Elî diyar kir ku çeteyan di nava kampê de û li derveyî wê xwe birêxistin dikirin, lê piştî qonaxa sêyemîn a Operasyona Mirovî û Ewlehiyê, tunekirina jêderên tundrawiyê, ewlehiyê û veşartina çekan di nav kampê de û derveyî wê êdî dikarin bêjin ku operasyon heta radeyekê êrişên terorîst rawestandin ku DAIŞ`ê plan dikir, bike.
Siyamend Elî anî ziman ku şaneyan êrişên dewleta Tirk a dagirker bi kar dianîn û got: "Li gorî delîlan, çekan û kesên hatine girtin, diyar dibe ku planeke mezin heye ku xwe dispêre êrişên dewleta Tirk û destpêkirina şerekî li herêmê ji bo ku DAIŞ êrişan pêk bîne mîna li girtîgeha Sînayê kiriye."
Qonaxa sêyemîn a Operasyona Mirovî û Ewlehiyê 6`ê Sibatê bi dawî bû.
Hêzên Ewlekariya Hundirîn a Bakur û Rojhilatê Sûriyeyê di daxuyaniya bidawîkirina operasyonê de, ragihand ku wê rê li pêşiya planên çeteyên DAIŞ`ê girtin ku hewl didan xwe ji nû ve bi rêxistin bikin, kampa Holê û herêmên nêzî wê kontrol bikin. Di operasyonê de berpirsê şaneyan tune kiriye, kesên fikrên tundraw belav dikin û berpirsên fetwayên kuştinê û 85 çete û kesên bi wan re hevkar in girtine.
(şx)
ANHA