74 şehîd li Tirbespiyê hatin bibîranîn

74 cangoriyên azadiyê yên mehên Çile, Sibat, Adar û Nîsanê bi merasîmekê li bajarê Tirbespiyê hatin bibîranîn.

ROJANE

19 nîsan, 2026 13:26

QAMIŞLO

Meclisa Malbatên Şehîdan a bajarê Tirbespiyê merasîma bîranîna 74 cangoriyên di mehên Çile, Sibat, Adar û Nîsanê de li cih û demên cuda şehîd bûne li dar xist.

Merasîma bîranînê li hola PYD`ê bi beşdarbûna bi dehan malbatên şehîdan û şêniyên bajêr bi deqeyek rêzgirtin dest pê kir.

Paşê endamê Meclisa Malbatên Şehîdan a Herêma Cizîrê Zîwer Elî axivî. Zîwer Elî anî ziman ku xwedîderketina li destkeftiyên şehîdan erkeke dikeve ser milê her kesî û ev li gotinên xwe zêde kir: "Divê em rêya ku şehîdan dabû destpêkirin berdewam bikin."

Zîwer Elî diyar kir ku bi saya şehîdan pêkhateyên herêmê; Kurd, Ereb, Suryan û ên din bi hev re di nava aramî û ewlehiyê de dijîn.

Endamê Meclisa Malbatên Şehîdan a Herêma Cizîrê Zîwer Elî, di dawî de got banga xurtkirina yekrêziya kurdî kir û got: "Ji her demê zêdetir gereke ku em yekrêziya Kurdî xurt bikin. "

Piştî axaftinan wêneyên şehîdên hatine bibîranîn bi sînevîzyonekê hat pêşandan û wesîqeyên wan hatin xwendin.

Merasîm bi berzkirina dirûşmên "Şehîd namirin" bi dawî bû.

(ex/bb)

ANHA