4. Festîvala Şehîd Zîlan li dar ket

Têkoşer Zîlan (Zeyneb Kinacî) 30’ê Hezîrana 1996’an çalakiyeke fedaî li dijî merasîma leşkerî ya artêşa Tirk a dagirker li Dêrsimê pêk anîbû. Di encama çalakiyê de hejmarek leşkerên Tirk ên dagirker hatin kuştin. Çalakiya fedaî ya şehîd Zîlan wekî berisv li hemberî hewldana hedefgirtina Rêber Abdullah Ocalan a 6’ê hezîrana heman salê hatibû kirin.

Ji bo bîranîna şehîd Zîlan, Yekitiya Jinên Ciwan 4. Festîvala Şehîd Zîlan bi dirûşma "Zîlan xwedawenda azadiyê" li parka Azadî ya rojavayê bajarê Qamişlo li dar xist. Şêniyên bajar û bajarokên kantona Cizîrê beşdarî festîvalê bûn. Dayik û jinên ciwan jî bi cilûbergên xwe yên neteweyî tev li festîvalê bûn.

'ŞEHÎD ZÎLAN JI BO ME NIMÛNEYEKE MEZIN E’

Ji rêveberên Yekitiya Jinên Ciwan Soryaz Simo axivî û got: "Em şehîd Zîlan ji xwe re nimûneyeke mezin dibînin û di têkoşîn û berxwedanê de wê ji xwe re pêşeng dibînin. Em ê bi fikrê Rêber Abdullah Ocalan têkoşînê bidomînin ta azadiya wî ya fîzîkî mîsoger bikin."

'ÇALAKIYÊ PLAN Û KOMPLOYÊN LAWAZXISTINA GELÊ KURD Û ÎRADEYA JINAN TÊK BIRIN'

Endama Koordînasyona Kongra Star Remziye Mihemed di şexsa şehîd Zîlan de hemû şehîdên Hezîranê bi bîr anîn.

Remziye destnîşan kir ku armanc ji çalakiya şehîd Zîlan bidawîkirina komployên li dijî Rêber Abdullah Ocalan bû  got: " Şehîd Zîlan bi çalakiya xwee plan û komployên bi armanca lawazkirina gelê Kurd û îradeya jinan têk birin."

Remziye diyar kir ku bajarê ku şehîd Zîlan lê çalakî kir, şahidê komkujiyên li Kurdan û kolekirina jinan  e, lê çalakiya şehîd Zîlan rêya dîrokê guherand.

Remziye diyar kir ku li hemberî tecrîda li ser Rêber Abdullah Ocalan, êrişên rojane yên li dijî herêmê û binpêkirinên li deverên dagirkirî, pêwîstî bi şopandina rêya şehîs Zîlan heye.

Festîval bi çalakiyên hunerî bi dawî bû. Hunermend Axîn, Bêrîvan Botan, koma Şehîd Sakîne, koma Şehîd Mizgîn, koma şanoyê û koma Rubû El Cezîre hunerên xwe pêşkêş bikin.

 (mh)

ANHA