Di 8`ê Adarê de bangên jinan ji bo azadiya fîzîkî ya Rêber Ocalan

Bi boneya 8’ê Adarê jinên kantona Qamişlo bi dirûşema ‘Bi Jin Jiyan Azadî, ber bi şoreşa jinê ve’ daketin qada û biryardariya têkoşînek hîn xurttir nîşan da.

Endama Kongra Star Erwa El Salih diyar kir ku di vê rojê de jinên Kurd û Ereb û pêkhateyên din dibin yek û got “Jin tenê dikare tevahî beşên civakê bîne gel hev. Ev roj ji bo me yekkirina têkoşîn û hêzê ye."

Erwa El Salih 8ʹê Adarê li Rêber Abdullah Ocalan pîroz kir û got: "Rêber Ocalan rêberê yekemîn e ku karîbû hevgirtina civakan ava bike. Rêbertî niha jî di bîr û dilê me de ye. Em di vê rojê de banga azadiya fîzîkê ya Rêber Ocalan dikin.”  

Jina bi navê Medya Sedûn 8’ê Adarê li Rêber Abdullah, gerîlayên azadiyê û şehîdan pîroz kir û got: ʹʹEm bi hêvî ne ku sala 2023’yan bibe sala serkeftinê û azadiya fizîkî ya Rêber Apo û bibe sala azadiya hemû jinên Rojhilata Navîn.ʹʹ

Dayika şehîd Sama Saliha Mistefa 8’ê Adarê li Rêber Abdullah Ocalan, gerilayên azadiyê û li jinên Kurdistanê û tevahî jinên cîhanê pîroz kir û got: ʹʹ8’ê Adarê rûmeta me ye. Bi saya fikir û felsefeya Rêber Apo me wateya 8ʹê Adarê nas kir. Em bang li tevahî jinên dunyayê dikin ku xwe birêxistin bikin, têkoşîna xwe xurt bikin û azad bibin. Pêwîst e jin xwedî li îrada xwe û şoreşa xwe derbikeve. Heta jin azad nebe, civak jî azad nabe. Ez bi hêvî me ku em têkoşîna xwe îsal bikin sala azadiya fizîkî ya Rêber Apo.”

ANHA