Roja yekemîn a çalakiya konvedanê ya ji bo şermezarkirina kuştina Nagîhan Akarsel bi dawî bû

Çalakiya konvedanê li parka rêber Abdullah Ocalan a taxa Nasra ya bajarê Hesekê, ji aliyê Akademiya Jineolojî, Meclisa Malbatên Şehîdan û Kongra Star ve, ji bo şermezarkirina kuştina aktîvîsta Jineolojiyê û endama Navenda Lêkolînan a Silêmaniyê Nagîhan Akarsel li taxa Bextyarî ya Silêmaniyê, hatin lidarxistin.

Di serî de bi navê Akademiya Jineolojiyê û bi beşdariya endamên Kongra Star û Meclisa Malbatên Şehîdan, daxuyaniyek hat xwendin û ji aliyê Tevgera Civaka Demokratîk (TEV-DEM), Kongra Star, Hêzên Ewlekariya Hundirîn û Yekitiya Jina Ermen ve peyam hatin xwendin.

Hevserokê Nivîsgeha Rêxistinê ya TEV-DEM’ê, Ferhan Dawûd wiha axivî: “Gelek dewletên wek Îranê hene ku bi kapîtalîzm û Îslamê bang dikin, lê ev li dijî îradeya gelan e.”

Ferhan Dawûd wiha lê zêde kir: “Erka me di vê qonaxa girîng de ew jî meşa li ser şopa şehîdan û fikrê rêber Ocalan e, ne tenê Kurd, lê belê hemû pêkhateyên Bakur û Rojhilatê Sûriyê jî.”

Her wiha, endama Koordînasyona Kongra Star a Hesekê, Welîde Botî destnîşan kir ku êrişên li dijî jinan tevahiya civakê dixin metirsiyê.

Piştre, endamê rêveber ê Hêzên Parastina Civakê (HPC), Hisên Nercis wiha axivî: “Komploya navneteweyî ya li dijî rêber Ocalan bi armanca têkbirina îradeya gelê Kurd û serkeftinên wî bû, berdewamiya êrişên dagirkeriya Tirk ên li dijî herêmê jî bi armanca qutkirina têkiliyên gelê Kurd û gelên din bi rêber Ocalan re ne.”

Her wiha hevseroka Yekitiya Jinên Ermen, Anahîd Qesebyan wiha axivî: “Bila dewleta Tirk a dagirker a ku jinan hedef digire, bizane ku her ku jinan hedef digire, ewqasî îrade û îsrara me ya berxwedanê zêdetir dibe, em li ser fikrê rêber Ocalan mezin bûn û tu tişt me lewaz nake.”

Anahîd wiha domand: “Em wek jinên Ermen berî 107 salan hatin qirkirin, lê tevî wê jî jinên Ermen ranewestiyan û xwe di civaka demokratîk de derxistin pêş, çand û kultura xwe vejandin û li hember dijmin sekinîn.”

Çalakiya konvedanê bi pêşandana sînevîzyonekê li ser jiyana şehîd Nagîhan Akarsel bi dawî bû û tê payîn ku çalakî heta sibe bidome.

(mh)

ANHA