Bi boneya Roja Qurbanên Terorê ya Navneteweyî li Helebê çalakî

Komeleya Giştî ya NY li gorî biryarnameya 72/165, ji bo bîranîna qurbanên terorê û ji bo piştgiriya wan bike, 21`ê Tebaxê wek Roja Qurbanên Terorê ya Navneteweyî diyar kir.

Desteya Kar û Barên Civakî û Xebitandinê ya Herêma Efrînê, bi vê boneyê çalakiyek bi dirûşma “Birîna we rûmeta me ye” li hola Star Layit a herêma Şiqeyif a Helebê li dar xist. Bi dehan gaziyên ji Şehba, Efrîn û Helebê tev li çalakiyê bûn.

Di çalakiyê de ji fermandarên Yekîneyên Parastina Gel (YPG) Şervan Efrîn axivî û got: “Şoreşa Tevgera Rizgariya Kurdistanê destkeftiyên dîrokî bi dest xistin. Gaziyan jî ax û welatê xwe parast. Ji ber wê ew ji bo gelên azad rêgez û bingeh in.”

Şervan Efrîn wiha domand: “Di Şoreşa Rojava de jî, bi hezaran ciwan ji hemû pêkhateyan tev li vê şoreşê bûn. Di oxira şoreşê û ji bo pêkanîna azadî û demokratiyê de parçeyek laşê xwe kir qurban.”

Şervan Efrîn diyar kir ku birîndaran, di eniyên parastina gelên herêmê de yên li hember êrişên dewleta Tirk a dagirker û terorîstan, li ber xwe da û tê koşiya.

Paşê Saziya Birîndarên Şer a Kantona Şehba şanoyek bi navnîşan “Berxwedan jiyan e” ya têkildarî êrişên dewleta Tirk a dagirker û berxwedana YPG`ê li hemberê pêşanda.

Piştre Koma Şehîd Engîzek a girêdayî Navenda Çand û Hunerê ya kantona Efrînê gelek stranên şoreşgerî, erebî û efrînî gotin û beşdaran xelekên govendê li ber gerandin.

Di dawiyê de diyarî li endamên Saziya Birîndarên Şer a taxa Şêxmeqsûd a Helebê hatin belavkirin.

ANHA