Li Şehba, Heleb û Kobanê mêr li hemberî tundiya li ser jinan li qadan bûn

Li kantona Şehbayê di çarçoveya çalakiyên 25'ê Mijdarê Roja Têkoşîna li dijî Tundiya li ser Jinan de meşek a mêran hate lidarxistin.

Di meşê de alên Kongreya Star, wêneyên şehîdên Berxwedana Serdemê û şehîdên komkujiyê dewleta Tirk a dagirker û posterên rêber Abdullah Ocalan hatin hildan. Beşdaran meşê elekên bi nivîsa "Na ji tecawizê re", "Na ji qetilkirinê re", "Na ji kuştina zarokan re", Na ji qirkirinê re ", her wiha pankartên bi rengê porteqalî yên bi nivîsên "Werin em tundiya li ser jinan bi dawî bikin", "Tê bikoşe! Tundî û dagirkeriyê têk bibe" û "Dem dema azadiyê ye" vekirin.

BERXWEDANA JINÊN LI KAMPAN HATE SILAVKIRIN

Meş ji pêşiya kampa Serdemê ya li gundê Til Sosîn dest pê kir. Di meşê de diruşmeyên silavkirina berxwedana jinan a li hemberî faşîzm û zilmê û silavkirina berxwedana şêniyên Efrînê yên li kampan hatin berzkirin.

Meş li qada Şaredariya Gel a gundê Til Sûsin rawestiya û deqeyeke rêz hate girtin. Piştre endama Meclisa Navçeya Ehdas Heyder Reşîd axivî û bal kişand ser sûcên dewleta Tirk a dagirker ên li dijî jinan bi taybet li herêma Efrînê ya dagirkirî û got: "Piştî ku jinê di avakirina şaristanî û pêşengiya civakê de rola herî mezin lîst, dagirkeriya Tirk hewl dide dîrok û nasnameya wê ji holê rake."

Heyder Reşîd diyar kir ku bi saya fikir û felsfeya rêber Abdullah Ocalan jinan xwe û dîroka xwe nas kirin û têkoşîna wan a li hemberî hewldanên tunekirina rola wê vê yekê diyar dike.

Endamê Meclisa kantona Şehbayê Heyder Reşîd bang li rêxistinên mirovî yên ku li kampên koçberan kar dikin kir ku li ser xizmetguzariyên xwe yên pêşkêşî jinan bikin.

HELEB

Bi dirûşma ''Tê bikoşe! tundî û dagirkeriyê têk bibe" bi dehan mêr ên taxên Şêxmeqsûd û Eşrefiyê yên bajarê Helebê derketin qadan û tundiya li ser jinan şeremzar kirin

Meş ji pêşiya holê civînan a li beşa rojavayî ya Şêxmeqsûd ber bi  navenda Meclisa Şehîd Gelhat a beşê rojavayê taxê ve dest pê kir. Di meşê de alên Kongreya Star û wêneyên rêber Abdullah Ocalan hildan û diruşmeyên "Jin jiyan  û azadî ye" û "Na, ji tundiya li ser jinan re" berz kirin

'JIN DÊ MÊRAN JI PERGALA DESTHILDARIYÊ XELAS BIKE'

Li ber Meclisa Şehîd Gelhat  ji bo bîranîna şehîdan deqeyeke rêz hate girtin. Paşê hevserokê Meclisa Giştî ya taxên Şêxmeqûd û Eşrefiyê Mihemed Şêxo axivî û got: "Jin hêmanê sereke yê navakirina civaka exlaq û polîtîk e, şeklê têkiliyên di navbera jin û mêr de girîng e, ji ber ku ev têkilî çarenûsa civakê bi tevahî diyar dike. Jin berê ve li hemberî zihniyeta desthilatdar tê dikoşe".

Endamê Meclisa taxa Şehîd Gelhat a li beşa rojhilat Cemal Mihemed diyar kir ku azadiya civakê bi azadiya jinê ve girêdayî ye û got: "Jin hêviya me ya di xilaskirina zihniyeta ku me kontrol dike. "

KOBANÊ

Têkildarî wê, Meclisa kantona Kobanê meşek li dijî tundiya li ser jinan orgenîz kirin, bi sedan mêrên kantona Kobanê, nûnerên saziyên Sivîl û leşkerî, Rêveberiya Xweser û partiyên siyasî yên kurdî tev li meşê bûn.

Meş li qada Şehîd Egîd dest pê kir, meşvanan wêneyên rêber Abdullah Ocalan û pankertên "Na ji tundiya Ii ser jinan re" û "Li Efrîna dagirkirî tundî li dijî jinan heye" hildan û ber bi qada Jina Azad ve çûn.

''KAPÎTALÎZM ŞERÊ JINÊ DIKE, JI BER KU JIN RASTIYA KAPTELÎZME DIZANE Û ŞERÊ WÊ DIKE''

Meş li qada Jina Azad veguherî mîtîngê. Endamê Desteya Dispilîna Giştî ya Partiya Yekitiya Demokratîk (PYD) Salih Nuh destnîşan kir ku jin ji demek dirêj ve li dijî tevahî rêbazên desthildarî û koletiyê têkoşîn dike, dema ku tev li şoreşa Rojava bû guhartinek eşkere li ser çalakiyên wê di tevagî qadên leşkerî, aborî û siyasî de çêbû.

Salih Nuh got: "Jin dayik, xwişk û tevahî civakê ye, lê kapîtlîzm jinê dike hedef, ji ber ku jin rastiya kaptelîzme dizane û şerê wê dike.''

Çalakî bi diruşmeyên silavkirina berxwedana jinan bi dawî bû.

ANHA