Jinên ji Eyn Îsayê bang li eşîran kir ku li dijî êrişên dewleta Tirk bisekinin

Dagirkeriya Tirk û çeteyên wê komkujiyên li dijî şêniyên Girê Spî berdewam dikin. Di heman demê de, hêzên dagirker jinan direvînin û îşkenceyê li wan dikin.

Îstîxbarata dewleta Tirk û çeteyên wê di vê salê de 7 jin ji gundewarên kantonê revandin û îşkenceyên hov li dijî wan pêk tînin.

Li gorî çavkaniyan 6 jinên revandî ji bajarokên Hemam El-Tirkman in, yek ji Silok a girêdayî Girê Spî ye.

Di 10'ê vê mehê de jî istîxbarata dewleta Tirk û çeteyên wê Maya Xelef El-Xelîl û zarokê wê yê 40 rojî ya ji eşîra Bakîrat û Rewda Ebid El-Ehmed ji eşîrê Tobal revandin.

Têkildarî mijarê, welatiya bi navê Emîra Omer a ji navçeya Eyn Îsa van sûcên li dijî jinan şermezar kirin û bang li şênî û eşîrên li Girê Spî kir ku serî hildin.

Çavkaniyan diyar kir ku di demên dawî de Maya El-Xelîl û Rewda Ebid El-Ehmed berê serî li rûspiyekî eşîran dabû da ku wan biparêze, lê belê dagirkeriya Tirk û çeteyên wê bi darê zorê revandin.

Endama Rêveberiya Kongreya Star a kantona Girê Spî Dîlan Hesen destnîşan kir ku armanca dagirkeriya Tirk û çeteyên wê ji van sûcan ew e ku vîna şêniyên herêma dagirkirî bişikîne. Her wiha Dîlan bang li eşîran kir ku li hember dagirkeriyê bisekine.

Dîlan bang li rêxistinên hiqûqî û jinan kir ku destwerdan bike û zextê li dewleta Tirk bike ku van sûcan rawestîne.

Ajansa me û rêxistinên hiqûqî revandin û destdirêjiya li dijî bi sedan jinên Efrînê û Serêkaniyê, belge kiribû.

(dm)

ANHA

<iframe width="560" height="315" src="https://www.youtube.com/embed/jcxmm1gaUEM" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>