Şêniyên Kobanê sersaxî ji malbata şehîd Mehmûd Kobanê re xwest

Bi sedan şêniyên kantona Kobanê sersaxî ji malbata şehîd Mehmûd Necmedîn Hemze (Mehmûd Kobanê) re xwest.

25 tîrmeh, 2021 12:59

KOBANÊ

Bi sedan şêniyên kantona Kobanê û Meclisa Malbatên Şehîdan a herêma Firatê, nûnerên Rêveberiya Xweser û saziyên civaka sivîl berê xwe dan gundê Piling ê 28 kîlometer dikeve başûrê Kobanê û sersaxî ji malbatên şehîd re xwestin.

Li gund konê sersaxiyê li pêşiya mala bavê şehîd hate vedan û bi wêneyên şehîd Mehmûd hate xemilandin. Merasîma sersaxiyê bi deqeyeke rêzgirtinê dest pê kir.

Piştre, Endamê Meclisa Malbatên Şehîdan a Herêma Firatê Arif Balî axivî û got, ewlad û dayikên wan dibistanên welatparêziyê ne, her wiha diyar kir ku erka ku dikeve ser milê wan parastina welat û ewladan e.

Di dawiya axaftina xwe de Balî got, ev welat gelek şehîd dane, piştî bi salan wê zarok van şehîdan bibîr bînin.

Birayê şehîd Mehmûd, Zinar Hemze jî axivî û got: "Şehîd ji bo rêya azadiyê pêşengên me ne, em soz didin şehîdan ku em ê li ser şopa wan bimeşin."

Şervanê Yekîneyên Antî-Teror (YAT) yê QSD'ê Mehmûd Necmedîn Hemze (Mehmûd Kobanê) 21'ê Tîrmehê di dema şopandina şaneyeke terorîst a DAIŞ`ê li gundewarê rojhilatê bajarê Hesekê de gihîşt asta şehadete.

(dx)

ANHA