Berhem Salih: Xwepêşandana aştiyane mafekî mîsogerkirî ye, tundî ne çare ye

Îro, serokê Iraqê Berhem Salih li ser bûyerên dawîn ên li Silêmaniyê û rewşa Başûrê Kurdistanê bi giştî, bi daxuyaniyekê wiha got: "Em bûyerên li Silêmaniyê yên ji beriya çend rojan ve wekî xwepêşandanên gel û tundiya li dijî xwepêşandêran ku di encamê de hin welatî û endamên hêzên ewlekariyê birîndar bûn û hejmareke avahî hatin şewitandin û xerabkirin, bi metirsiyeke mezin dişopînin."

Salih wiha dewam kir: "Xwepêşandana aştiyane mafekî destûrî yê misogerkirî ye, divê rêzdarî jêre were nîşandan. Ji mafên welatiyan e ku xwepêşandanên aştiyane li dar bixin û daxwaza mafên xwe yên rewa bikin, bi taybetî mafên girîdayî jiyaneke bi rûmet ji wan û malbatên wan re wekî dayîna mûçeyan û başkirina rewşa jiyanî û xizmetên giştî."

Salih her wiha diyar kir ku divê aliyên hikumetê yên têkildar van daxwazan bi cih bînin, çareyên bingehîn ji pirsgirêka mûçeyan re bibînin û rewşa jiyanî baş bikin û wiha got: "Divê ew gavên lezgîn û cidî bên avêtin."

Berhem Salih destnîşan kir ku ji bo bersivdayîna daxwazên rewa yên welatiyan, tundî ne çare ye û divê îrade û rêzdarî ji daxwazên xwepêşandêran bên nîşadan û wiha domand: "Em ji hêzên ewlekariyê dixwazin ku li gorî qanûnê tevbigerin û tundiyê bi kar neynin, her wiha rê bidin dezgehên çapemeniyê ku karê xwe bê astengî û destdirêjî û bi azadî bikin."

(cx