Ciwanên Hesekê li dijî êrişên dagirkeriyê daketin qadan

Ciwanên kantona Hesekê li dijî êrişên dewleta Tirk a dagirker ên li ser herêma Heftenînê daketin qadan.

CIWAN

9 îlon, 2020 18:48

HESEKÊ

Yekitiya Jinên Ciwan a kantona Hesekê li dijî êrişên dewleta Tirk a dagirker ên li ser herêma Heftenînê meşek li dar xist. Bi dehan ciwanên kantonê beşdarî meşê bûn.

Ciwanên kantonê ku ji çerxerêya Sînalko ya taxa Til Hecer a bajarê Hesekê dest pê kir, alên Tevgera Ciwanên Şoreşger a Sûriyê, Partiya Yekitiya Demokratîk (PYD) hildan û bê navber diruşmeyên silavkirina berxwedana Heftenînê û şermezarkirina êrişên dewleta Tirk berz kirin.

Meş li çerxerêya Agirkujiyê ya heman taxê rawestiya. Ciwanan deqeyeke rêz girtin.

Piştre, endama rêveber a Yekitiya Jinên Ciwan Zeyneb Elî êrişên dewleta Tirk ên li ser Heftenîn û çiyayê Kurdistanê şermezar kirin û banga berxwedanê heta pêkanîna serkeftinê û rizgarkirina herêmên dagirkirî li ciwanan kir.

Yekitiya Jinên Ciwan, di meşê de ragihandina pêngava "Em ê teqez bi serkevin" ragihand.

Meş bi diruşmeyên silavkirina berxwedana Heftenînê û şermezarkirina êrişên dewleta Tirk a dagirker ên li ser Kurdistanê bi dawî bû.

ANHA