Komîna Sînemayê ya Avrîn amadekariyên Mîhrîcana Lêlûn eşkere kirin

Bi tevlêbûna gelek dazgehên çapemeniyê, berpirsên Komîna Sînemayê ya Avrîn civîneke çapemeniyê li Kampa Berxwedan a li kantona Şehbayê li dar xist. Ji bo ku amadekariyên Mîhrîcana Lêlûn a navneteweyî ya ku tê payîn di 21`ê Îlonê de li dar bikeve, eşkere bikin.

Endamê rêveber ê Komîna Sînema Avrîn Mihyedîn Arselan di kongreyê de axivî û diyar kir ku wan bi armanca eşkerekirina xebatên şeş mehan a lidarxistina Mîhrîcana Lêlûn a navneteweyî, ev kongre li dar xist.

Arselan îşaret pê kir ku ew ji pêşendana mîhrîcanê li kantona Şehba û di nav koçberan de, armanc dikin bêdengiya navneteweyî ya li hemberî sûcên dewleta Tirk a dagirker li dijî şêniyên herêmên dagirkirî û koçberên Efrîn, Serêkaniyê û Girê Spî bişkînin.

Arselan di berdewama axaftina xwe de bal kişand ser ku ew ji lidarxistina mîhrîcanê di vê dema hesas û dijwar de li gel belavbûna vîrûua Korona li cîhanê, dixwazin azarên koçberan bi rêya kesayetên navdar ên ku di warê sînemayê de kar dikin, ragihînin derve.

Li gorî Arselan 2 hezar û 150 fîlm ji 150 dewletan hatine girtin. jê 58 fîlm li gorî hejmara berxwedana şêniyên Efrînê li hemberî artêşa Tirk a dagirker û çeteyên wê de hatin pejirandin.

Arselan piştrast kir ku mihrîcan dê li Kampa Berxwedan di nav koçberên Efrînê de lidar keve û wiha domand: “Em hêvî dikin ku ev mihrîcan li cîhanê deng vede û bal bikişîne ser bêdengiya navdewletî li hember dagirkirina herêmên xwe ji hêla artêşa Tirk a dagirker û çeteyên wê ve.”

Di kongreyê de deriyê pirsan ji rojnamevanan re hate vekirin. Rêveberên komînê jî bersîva wan da û diyar kir ku fîlm tenê wê li Şehbayê werin pêşandan.

(şx)

ANHA

<iframe width="560" height="315" src="https://www.youtube.com/embed/ybqs9GBHBRI" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>