Weqfeya Jina Azad buroya xwe li Tebqayê vekir

Weqfeya Jina Azad bi merasîmekê buroya xwe li herêma Tebqayê vekir.

JIN

13 hezîran, 2020 15:35

TEBQA

Buro bi armanca desteka madî û civakî û vekirina projeyên biçûk ji bo jinan li çarxerêya Şehîdan hate vekirin.

Bi dehan jinên herêmê Tebqayê, nûnerên buroweqfeyê yên herêmên Cizîr û Firatê, endamên û rêveberên melisên jinan ên herêma Tebqayê di merasîmê de amade bûn.

Piştî deqeya rêzgirtin, endama rêveber a Weqfeya Jina Azad a kantona Kobanê Emîna Mihemed vekirina buroyê li jinên herêmê pîroz kir û got: "Ev gav dê rola jin û tevlêbûna wê ya nava civakê bi hêz bike. Armanca me ya vekirina buroyê piştevaniya hemû çalakiyên perwerdekirina jinan û rizgarkirina wan ji qeydên civakê ye da ku rola xwe ya pêşeng di qadên siyasî, leşkerî û aborî vegerîne."

Emîna anî ziman ku buro bi rêya dewreyên mîna dirûtin, wênesazî, peykersaz û hemşîretî destekê bidin jinên herêmê, her wiha got dê çalakiyên piştevaniya civakî ya bi zarokan re di nava dibistan û baxçeyên zarokan de û têkoşîna li dijî tundiya li ser jinan organîze bikin.

Piştî axaftinan, deriyê navendê ji aliyê dayikên şehîdan ve hate vekirin.

ANHA