Saziyên zimhêrê li herêma Cizîrê rê li pêşiya keysbaziyê digirin

Hevserokatiya Meclisa Rêveber a Bakur û Rojhilatê Sûriyê bi armanca pêşîlêgirtina belavbûna Koronavîrusê (Covid-19) biryarnameyek ragihand û ji saet 06:00’an ve qedexeya derketina derve dest pê kir.

Firin, firoşgehên kel û pelan û dermanxane vekirî ne.

Komîteya Zimhêrê li herêma Cizîrê rê li pêşiya keysbazkirina biryara qedexeya derketina derve û bilindkirina nirxên kel û pelan digire.

Hevserokê Saziya Zimhêrê ya şaxê navçeya Tirbespiyê Mihemed Abdulellah destnîşan kir ku komîteyê gerên xwe zêde kirine û rê li pêşiya keysbazkirinê digirin. Abdulellah bang li welatiyan kir ku dema gilî û gazinên wan der barê xwedanên dikanan de hebe, serî li saziyê bidin.

Mihemed Abdulellah diyar kir ku wan beriya 2 rojan xwedanên dikanan hişyar kirine û gotine divê nirxên kel û pelan werin daliqandin, îro jî ji saetên sibê de gerên xwe zêde kirine û kesên nirxên diyarkirî binpê bikin, dê werin cezakirin.

Welatiyê bi navê Yusif Murad got nirxên hin kel û pelan zêde bilind bûne, di vê derbarê de gera Komîteya Zimhêrê xizmeta welatiyan dike û spasiya wan dikin. Her wiha welatiyê bi navê Xalid El-Hisên bal kişand ser ku hin dikanên biryara qedexeya derketina derve keysbaz dikin, lewma bang li Komîteya Zimhêrê dikin ku rê li pêşiya bilindbûna nirxên kel û pelan bigirin.

(eh)

ANHA