Şêniyên Efrînê şehîdên xwe bi bîr anîn

Bi rasthatina salvegera duyemîn a dagirkirina kantona Efrînê ji aliyê artêşa Tirk a dagirker û çeteyên wê ve, bi dehan şêniyên herêma Efrînê serdana goristana Şehîdan a li navçeya Fafînê kirin. Şêniyan wêneyên şehîdên Berxwedana Serdemê, şehîdên komkujiya Til Rifet û gundê Eqîbê li goristanê danîn û mûm li ser gorên wan vêxistin.

Bi navê Meclisa Malbatên Şehîdan daxuyaniyek hate xwendin.

Di daxuyaniyê de bal hate kişandin ser êriş û binpêkirinên artêşa Tirk a dagirker û çeteyên wê yên li ser herêma Efrînê û hate gotin: "Hovîtiya wan gihişt wê astê ku çekên NATO û yên qedexekiriî li dijî sivîlan bi kar bînin. Dayikan di oxira doza azadiyê û bersivdayîna êrişan kezebên xwe dan. Di encamên van êrişan de şênî neçar man li cihekî ewle li herêmên Şehbayê bigerin. Ne deverên dîrok û şûnwar û ne jî gorên şehîdan ji binpêkirinên dagireran bê par neman."

Di berdewama daxuyaniyê de hate diyarkirin ku çand û perwerdeya biyanî li kantona Efrînê hatine ferzkirin û hate destnîşankirin ku tevî azarên koçberiyê û berdewama komkujiyên mîna Til Rifetê ku di encamê de 8 zarok bûne qurbanî, şênî ji mafê xwe yê vegera li jiyaneke bi rûmet li ser xaka xwe ya dîrokê paşde venegeriya.

Meclisa Malbatên Şehîdan di dawiya daxuyaniyê de got: "Em Meclisa Malbatên Şehîdan ji bav, dê, hevjîn, xwişk û bîra û zarokên şehîdan şehîdên xwe yên qehreman bi bîr tînin, em ji bo rizgarkirina welatê xwe û serkeftina gelê xwe fedayî ne. Bi yek dengî em bang dikin sonda me têkoşîn e, em ê asta şoreşa avakirina civaka exalq û polîtîk bilind bikin. Ji ber fedekariyên ku me kirine em bang li rêxisitnên hiqûqî û Neteweyên Yekbûyî dikin ku bêdeng nemîne û erkên xwe li gorî pîvanên navdewletî pêk bînin û zextê li dewleta Tirk a dagirker bikin da ku ji hemû herêmên dagirkirî derkevin û Erdogan wekî sûcdarê şer darizînin."

Piştî xwendina daxuyaniyê diruşmeyên dilsoziya bi şehîdan re hatin berzkirin.

ANHA