Şehîdên meha Sibatê li Dêrikê hatin bibîranîn

Meclisa Malbatên Şehîdan a herêma Dêrikê, 35 şehîdên meha Sibatê ku di dem û cihên cuda yên herêmên Bakur û Rojhilatê Sûriyê û çiyayên Kurdistanê de şehîd bûne, bi merasîmekê bi bîr anîn. Merasîm li Navenda Dîcle ya Çand û Hunerê li dar ket û bi dehan malbatên şehîdan û endamên saziyên civaka sivîl tev lê bûn.

Hola ku merasîm lê li dar ket, bi wêneyên rêber Abdullah Ocalan û yên 35 şehîdan hatibû xemilandin û ji bo bîranîna şehîdan 35 mûm hatin pêxistin. Merasîmê bi rêzgirtinê dest pê kir. Piştre Meclisa Malbatên Şehîdan navên 35 şehîdan xwendin.

Ji rêveberên Meclisa Malbatên Şehîdan Heqî Sîpan wiha axivî: "Em hemû şehîdên ku ji bo azadiyê û pêkanîna xewnên gelê Kurd û gelên bindest canê xwe feda kiriye, bê rêzdarî bi bîr tînin."

Sîpan di dewama axaftina xwe de destnîşan kir ku ji hemû gelên Bakur û Rojhilatê Sûriyê û malbatên şehîdan tê xwestin ku yekitiya xwe ava bikin û li hember êrişên dewleta Tirk û çeteyên wê yên li ser herêmê, têkoşîna xwe bilind bikin û wiha pê de çû: "Da ku em armancên şehîdên xwe ku di oxira wan de şehîd bûne, pêk bînin, em ê şopdarên rêya şehîdên xwe bin."

Piştre der barê dîrok û têkoşîna şehîdên meha Sibatê yên herêma Dêrikê de, sînevîzyonek hat pêşandan.

Merasîm bi stranên şoreşgerî ji aliyê komên girêdayî Navenda Dîcle ya Çand û Hunerê a bajarê Dêrikê ve, tilîliyên dayikan û dirûşmeyên dilsoziya bi şehîdan re, bi dawî bû.

 (bx)

ANHA