Cenazeyê şehîd Xalid li Sirînê hate veşartin

Şervanê Meclisa Leşkerî ya Minbicê Xalid Ziyad Menle (Ebû Mihemed ) dema êrişên artêşa Tirk a dagirker û çeteyên wê yên li dijî gundewarê Minbicê dida şehîd bû.

Nûnerên Rêveberiya Xweser, endamên saziyên sivîl ên bajarê Kobanê û navçeya Sirîn, endamên Rêveberiya Sivîl a Minbicê û gundewarê wê, şervanên Meclisa Leşkerî ya Minbicê û bi sedan şênî di merasîmê veşartina cenazeyê şehîd Ebû Mihemed de amade bûn.

Merasîm li goristanê bi deqeyek rêzgirtin destpê kir. Paşê Mudirê Dîwana Meclisa Leşkerî ya Minbicê Îbrahîm Şerîde axivî û anî ziman kir ku bi saya şehîdan herêm ji terorê rizgar bû. Şerîde soza şopandina rêya şehîdan da.

Bi navê Meclisa Malbatên Şehîdan hevserokê Şaredariya Gel a navçeya Sirînê Mistefa Muslim sersaxî ji malbatên şehîdan xwest û got: "Şehîdan ji bo ku gel di nav ewlehiyê de bijî canê xwe feda kirin. Em soz didin ku destkeftiyên wan biparêzin."

Piştre wesîqeya şehadeta şehîd hate xwendin û radestî malbata wî hate kirin. Di dawiyê de şervanên Meclisa Leşkerî ya Minbicê cenazeyê şehîd li Goristana Şehîdan a Sirînê veşartin.

(şx)

ANHA