Li navçeya Til Hemîsê pirsgirêka qirêjbûna avê

Ji ber ku ava şor tevlî nav ava bîrek a stasyona El-Iheymir û sê bîrên din bûye, êdî ava bîran nayê bikaranîn û 12 gundên bajarokê Cezaayê bê av mane.

Stasyona El-Iheymir bi 7 km ji navenda bajarokê Cezaa dûr e. Bi xwe ji 4 bîran pêk tê û av dighîne van gundan; El-Iheymir, Mezrat El-Iheymir, Sefwat, Mezrat Hinwe, Zerqaa, Mezari Zerqaa, Zubeyde, Bikariye tevî bajarokê Cezaa, Cedîde û Filistîn Şerqiye.

Endamê Komîteya Xebatan a Meclisa bajarokê Cezaa Ebdulselam El-Yusif got: “Sedema vê bûyerê ew e ku ava bîrekî şor tevlî ava sê  bîrên din bûye. Dema çeteyan herêm dagir kiribûn alavên stasyona El-Iheymir talan kirinbûn. Ji ber stasyon çend sal in nexebite, lewra bû sedema ku ava bîrekî ji stasyonê şor bibe û ava wê tevlî nav ava sê bîrên din bibe."

El-Yusif destnîşan kir ku Desteya Herêmî û Şaredariyan a herêma Cizîrê hewl daye pirsgirêkê çareser bike û wiha domand: "Desteya Herêmî û Şaredariyan a herêma Cizîrê bîrek nû ji bo ku avê bide stasyonê kola. Ava wê dihat vexwarin. Lê piştî demekê ava bîrê şor bû û tevlî nav ava bîrên din bû. Ji ber wê pirsgiêk derket." El-Ysif pêşniyar kir ku bîra ku ava wê şor e were xitimandin.

Komîteya Avê ya bajarokê Cezaa diyar kir ku wê daxwaznameyek girêdayî stasyona El-Iheymir ji Şaredariya Gel a navçeya Til Hemîsê re rêkiriye. Komîteyê tekez kir ku Şaredariya navçeyê hewl dide komîteyek ji endezyar û pisporên jeoyalojî ava bike da ku stasyon û bîra ku ava şûr derbasî bîrên din dike keşif bike. Li gorî rapora komîteyê dê girtekên pêwîst bêne girtin.

Eger pirsgirêka bîra ava şor çareser bû, wê demê pirsgirêka 6 hezar şêniyên 12 gundên bajarokê Cezaa wê çareser bibe.

(şx/bm)

ANHA