Di dibistanên Minbicê de pergala hevserokatiyê

Komîteya Perwerde û Fêrkirinê ya Minbicê û gundewarê wê bi armanca ku sîstema hevserokatiyê di dibistanên bajêr û gundewarên wê de bide rûniştandin 250 nûnerên dibistanan ji bo vî erkî tevlî dewreyeke perwerdeyê kiribûn. Dewreya perwerdeyê 5 rojên, her rojekê 4 saetan dom dikir.

Dewreya perwerdeyê îro bi dawî bûn.

Girêdayê mijarê koordînatorê giştî yê dewreya nûnerên dibistanên Minbicê û gundewarê wê mamoste Hesen El-Ebdullah got: "Piştî bidawîbûna sala perwerdeyê ya 2019`an, me dest bi vekirina dewreyan ji mamsoteyên refan re kir. Piştî wê me dewreyên taybet ji bo rêveberên dibistanên Minbicê û gundewarê wê vekir. Di dewreyê de 5 ref hebûn. Di her yekê de 40 rêveber hebûn."

Têkildarî perwerdeya ku rêveberan dîtine El-Ebdullah got: "Rêveber perwerdeyên xwe li ser karê rêvebertî li gorî 5 beşên zanistî dîtin. A yekê erkên rêveber, şêwazên rêvebertiyê, hunera têghiştinê û belgeyên îdarî û malî."

El-Ebdullah di dawiyê de armanca dewreyê diyar kir û got: "Armanca sereke bilindkirina asta rêveberan e heta ku karibe bi awayekî baş erkên xwe binin cih."

Komîteya Perwerde û Fêrkirinê plana xwe yên perwerdekirina mamoste û rêveberan berdewam dike.

(şx)

ANHA