Li Şehbayê sersaxî ji malbatên şehîdan re hat xwestin

Konê sersaxiyê li gundê Til Qerah ê kantona Şehbayê ji aliyê Meclisa Malbatên Şehîdan ve hat vedan. Di bin konê sersaxiyê de wêneyên şehîdan, wêneyên Rêberê Gelê Kurd Abdullah Ocalan û ala Meclisa Malbatên Şehîdan hatin daliqandin.

Şêniyên ku tev li çalakiya konvedanê ya Kongreya Star ji bo piştgiriya çalakiya greva birçîbûnê ya ji bo rakirina tecrîda li ser Rêberê Ocalan û bi sedan şêniyên herêma Efrîn ji Kurd û Ereb tev li merasîma sersaxiyê bûn.

Merasîma sersaxiyê bi rêzgirtinê dest pê kir. Paşê navên her 8 şehîdan Emîra Hemo (Agirî Zagros), Bêrîvan Hebeş (Amara Rojhilat), Dilava Mihemed (Avaşîn Kendal), Xelîl Nasan (Rêdûr Efrîn), Osman Osman (Xabûr Efrîn), Rifat Mamo (Rojhat Welat), Têkoşer Efrîn û Tolhildan Efrîn hatin xwendin.

Di merasîma sersaxiyê de endamê Meclisa Malbatên Şehîdan Xelîl Îso, endama Meclisa Malbatên Şehîdan a Efrînê Zelûx Bekir û endama Kongreya Star Ayişe Xezne axivîn.

Di axaftinan de sersaxî ji malbatên şehîdên re ku ji bo azadiya gel û rizgarkirina welatê xwe ji zilm û terorê canê xwe feda kirin, hat xwestin. Her wiha serkeftina QSD`ê li dijî çeteyên DAIŞ`ê hat pîrozkirin û soza şopandina rêyan şehîdan heta pêkanîna armancên wan hat dayîn.

Di dawiyê de wesîqetên şehadetê ji aliyê endama KPC-Demokratîk Şêrîn Silêman ve hatin xwendin û radestî malbatên şehîdan hatin kirin. Merasîma sersaxiyê bi dirûşmên silavkirina Berxwedana Serdemê û silavkirina berxwedana Leyla Guven bi dawî bû.

(bx)

ANHA