Ji komxebata Şehbayê banga yekrêziyê

ŞEHBA

Ev saleke dewleta Tirk a dagirker û çeteyên wê Efrîn dagir kirine. Rûspiyên êlan, gelê Efrîn û Şehbayê komxebatek bi şîara ‘Na ji dagirkeriya Tirk re, na ji guhertina demokrafîk re’ organize kirin.

Rûspiyên êlên Efrîn û Şehbayê, kesayatên serbixwe ji pêkhateyên Kurd, Ereb û Suryan, nûnerên her du meclisên Efrîn û Şehbayê, Partiya Pêşerojê ya Sûriyê, Hevalbendiya Demokratîk a Sûriyê, Meclisa Jin a Şehbayê û Partiya Guhertin û Pêşxistinê ya Sûriyê beşdarî komxebatê bûn.

Komxebate li hola Navenda Şehîd Axîn Welat a Çand û Hunerê ya navçeya Fafînê ya kantona Şehbayê hat lidarxistin. Li holê dirûşmeya komxebatê, wêneyên birîndar û şehîdên sivîl ên ku di êrîşên dagirkeriya Tirk ên li ser Efrînê de şehîd û birîndar bûne hatin daliqandin.

Di komxebatê de 6 mijar hatin gotûbêjkirin; Kurtedîroka Efrîn û xwezaya wê piştî 2011`an, topbarana dageriya Tirk li ser Efrînê, binpêkirinên li ser dîrok û gelê Efrînê, qonaxa yekem û duyem ên Berxwedana Serdemê, guhertina demografik, binpêkirinên li dijî olên Xiristiyan û Êzidiyan.

Bi navê rûspiyên êlan Muaz Rislan axivî û binpêkirinên  Tirkiyê yên li ser şêniyên Efrînê nirxand. Rislan tekez kir ku êlên herêmê dê li rex Berxwedana Serdemê bin heya ku Efrîn rizgar bibe û şênî vegerin warên xwe.

Beşdarên komxebatê Lezgîn, Ilham Hemo, endamê Komîteya Şûnwaran a Efrînê Selah Sîno, endama Kongreya Star Hêvî Silêman her yek girêdayî mijarekê axivîn.

Paşê sekreterê giştî yê Partiya Guhertin û Pêşxistinê ya Sûriyê Mistefa Qelecî axivî. Qelecî destnîşan kir ku pêwîst e gelê Sûriyê beyî mudexeleyên derve aloziya Sûriyê nîqaş bike û çareser bike.

Di dawiya gotinên xwe de Qelecî bang li tevahiya gelê Sûriyê kir ku vegerin maseya diyaloga Sûrî-Sûrî. Qelecî diyar kir ku ji bilî çareseriyek siyasî ya beyî mudexeleyên derve ji bo çareseriya aloziya Sûriyê ne pêkan e.

Piştre rûspiyê êla El-Begara Mensûr El-Selûm axivî û bêdengiya cîhanê li hember binpêkirinên dagirkeriya Tirk ên li ser gelên Sûriyê şermezar kir. El-Mensûr destnîşan kir ku Erdogan mîna vîrusê ye û di nav tevna civaka Sûriyê de belav dibe. El- Mensûr got ji ber vê jî yekîtiya niştîmanî pêwîst e.

Siyasetmedar Îsam Ezûz diyar kir ku trajediya dagirkirina Efrînê dişibe trajediya Filistînê ya sala 1948`an. Ezûz destnîşan kir ku mudexeleyên derve di serî de Tirkiyê Sûriyê wêran kir û banga amadekirina destûrek nû ji Sûriyê ku tê de mafên tevahiya gelê Sûriyê miroger dibe, kir.

 (şx)

ANHA