‘Tevî ku em li kampê dijîn jî em bi mayîna li Rojava kêfxweş in’

NESRÎN ALÎ / HESEKÊ

Di encama dagirkerina çeteyên DAIŞ`ê ji gelek herêmên Iraq û Sûriyê re, bi hezaran şênî ber bi herêmên ewle ve ku QSD`ê rizgar kirine û aramî û ewlehî lê peyda dibe, hatin.

Piştî ku şêniyên Iraq û Sûriyê ji malên xwe derketin, berê xwe dan kampan û li wir bi cih bûn. Ji ber vê yekê niha li kampa Holê nêzî 37 hezar koçber û penaber dimînin û li gorî gotina rêveberiya kampê hejmara koçber û penaberan zêde dibe.

Penabera iraqî Istibraq Ehmed (20) ku diya 2 zarokan e, got ji ber dagirkeriya çeteyan ji herêma wê re, wê gelek êş û jan kişandin, çeteyan ew ji malên wan derxistin û malên wan wêran kirin.  Istibraq wiha axaftina xwe domand: "Li Iraqê em rastî gelek sîtemkariyê ji aliyê çeteyan ve hatin, malên me wêran kirin, ji ber vê yekê me berê xwe da herêmên ji aliyê QSD`ê ve hatine rizgarkirin, ji ber ku ev herêm ewle ne.”

Istibraq wiha dewam kir: “Ji destpêka ez derbasî Rojava bûm, ez bi xerîbiyê nehesiyam û rêveberiya kampê pêşwaziya min kir.” 

Istibraq bal kişand ser ku ev bûye 3 sal li kampa Holê dimîne, êdî kamp bûye mala wê û wiha axaftina xwe domand: "Rêveberiya kampê bi awayekî baş bi me re dide û distîne û çi ji destê wan were ji bo rihetiya me dikin. Lê em ji paşguhkirina rêxistinên mirovî yên ku alîkariya me nakin, aciz in.”

Di dawiya axaftina xwe de Istibraq Ehmed wiha got: "Ji ber aramî û jiyana hevbeş a di navbera şêniyên kampê de, ez bi Rojava ve hatime girêdan, mîna ku welatê min ê sereke be. Ji ber vê yekê  mayîna li vir baştir e ji êşa ku me li ser destê çeteyan dîtiye."

Hêjayî gotinê ye ku kampa Holê ji aliyê Rêveberiya Xweseriya Demokratîk a Herêma Cizîrê ve di sala 2016`an de hate vekirin. Sedema vekirina kampê jî, ji ber bi destpêkirina rizgarkirina Mûsilê re ji bo pêşwaziya penaberên Iraqî yên ji ber tundiya çeteyên DAIŞ`ê direviyan.

(ekîb)

ANHA