Çalakiya jinan li Tebqayê bi dawî bû

TEBQA

Rêveberiya Jin a Tebqayê û Yekîtiya Jina Ciwan bi armanca şermezarkirina gefên Tirkiyê li dijî herêmên Bakur û Rojhilatê Sûriyê beriya 3 rojan li qada Geraca Giştî li paş sûka navendî ya Tebqayê çalakiya konvedanê dabû destpêkirin.

Hevseroka Meclisa Rêveber Hind El-Elî, Komîteya Jin, Komîteya Hundirîn, Komîteya Parastin û Xweparastinê, Komîteya Çand û Hunerê û bi dehan şêniyên bajêr û gundewarê wê tev li çalakiyê bûn.

Di dirêjahiya 3 rojên çalakiyê de endamên komîteyên Rêveberiya Sivîl û malên gel tevî nûnerên Fermendariya Giştî ya QSD'ê serdana konê çalakiyê kirin. Gelek belgefîlimên girêdayî berxwedana jin û têkoşîna wê ya rizgarkirina herêmên Bakur û Rojhilatê Sûriyê hatin pêşandan.

Di roja dawî ya çalakiyê de endama rêveber a Meclisa Malbatên Şehîdan Yasmîn El-Mihemed axivî û rola jin a dîrokî ji bo rizgarkirina gelan destnîşan kir. Yasmîn wiha domand: "Ji xaka pîroz ku bi xwîna şehîdan hatiye avdan, em ji cîhanê re û Erdogan re teqez dikin ku em dîrokê bi fedekarî û destanên xwe divîsin. Dîroka me bi xwîna şehîdan hatiye nivîsandin û dê kes nikaribe wê berovajî bike."

Di dawiya axaftina xwe de Yasmîn soza şopandina rêya şehîdan da û teqez kir ku ew ê têkoşîn û berxwedanê ji bo parastina xaka welat bidomînin.

Ji aliyê xwe ve endama rêveber a Meclisa Jin a El-Cirniyê Huda El-Esaf axivî û destîşan kir ku wan bi rêya çalakiya xwe rola mezin a jin di şkandina komployên ku herêmê dikin hedef, isbat kirine. Huda teqez kir ku ew ê çalakiyên xwe heta ku cîhan rastiyê bibîne bidomînin.

Çalakî bi berzkirina dirûşmeyên silavkirina berxwedana jin dawî bû.

(şx)

ANHA