Malbatên şehîdên Dêrazorê li dijî gefên Tirkiyê meşiyan

DÊRAZORÊ

Bi sedan malbatên şehîdên Dêrazorê ji bo şermezarkirina gefên Tirkiyê li ser herêmên Bakur û Rojhilatê Sûriyê meşek li dar xistin.

Malbatên şehîdan ku wêneyên zarên xwe yên şehîd, alên QSD û Meclisa Malbatên Şehîdan hilda bûn ji pêşiya têkerina bajarokê El-Kesra ji aliyê rojava ve dest bi meşê kirin û di wê navberê de dirûşmeuyên şermezarkirina dewleta Tirk berz dikirin.

Meş li ber çarxeriya El-Muntesaf a bajarokê El-Kesra rawestiya û veguherî mitîngê. Di mitîngê de gelek axaftin hatin kirin. Ji fermandarên QSD'ê Goran axivî û got: "Ji bo vî gelî û vê axê me bi hezaran şehîd dan. Bi saya xwîna wan şehîdan herêmên me ji çeteyên dewleta Tirk a dagirker hatin rizgarkirin."

Bi navê Meclisa Zagonsaz endama meclisê Raniya Hibo axivî û mudexeleyên Tirkiyê li herêmê şermezar kirin. Raniya destnîşan kir ku Tirkiyê ji destpêka aloziya Sûriyê ve hewl dide tevlheviyê di navbera şêniyan de derbixe û wiha domana: "Ji ber ku em gelek berxwedêr in me palnên Tirkiyê têk birin. Niha Tirkiyê hewl dide serfiraziya Osmaniyan vegerîne herêmê. Em dagirkeriyê qebûl nakin û em nahêlin ku carek din komkujiyan pêk bîne."

Paşê Hiyam Mehmûd bi navê Koordînasyona Jin a herêma El-Kesra û Betûl Yûsif bi navê Mala Jin a El-Kesra axivîn û hevgirtin, hevkarî û yekrêziya şêniyan di sekinandina li hember êrîşan de destnîşan kirin.

Mîtîng bi berzkirina dirûşmeyên dilsoziya bi şehîdan re û şermezarkirina dagirkeriya Tirk bi dawî bû.

(şx)

ANHA