Meşa jinên Tebqayê bi dawî bû

TEBQA

Piştî derbaskirina zêdetirî 17 km meşa jinên Tebqayê ya ku ji gundê Hinêdî li rojhilataê bajarê Tebqayê destpê kiribû, gihîşt bajarê Tebqayê û jinan berê xwe dan avahiya Rêveberiya Jin a Tebqayê. Li avahiya rêveberiyê bi dehan jinên Tebqa û endamên jin ên saziyên sivîl meşa jinan pêşwazî kirin.

Meş veguhrî mitingê. Hevseroka Meclisa Qanûnsaz Rewşen Hemê axivî û meşa jinan silav kir û got:"Di dema ku QSD'ê pêngava leşkerî ji bo qewirandina DAIŞ'ê ji Dêrazorê didomîne, Erdogan derdikeve û gefa êrîşan li herêmên Bakur û Rojhilatê Sûriyê bi armanca têkbirina ewlehiya herêmê ya ku di bin banê projeya Neteweya Demokratîk de hatiye pêk anîn, dixwe."

Her wiha bi navê Rêveberiya Jin a Tebqa endama rêveber Huda El-Elî axivî û jinên Tebqayê yên ku tev li meşê bûne silav kir û got: "Em ji kujerê serdemê û dijminê mirovahiyê re dibêjin ji her destpêkekê re dawiyek heye. Dawiya me serkeftinê lê dawiya dijminê me bi saya berxwedana gelê me û fedekariyên şehîdan êdî nêz maye."

Piştî bi dawîbûna axaftinan jinan solganên 'Mirin ji faşîzmê re', 'Mirin ji Erdogan re', 'Bijî biratiya gelan' berz kirin.

(şx)

ANHA