‘Em li hember gefên Erdogan bê deng namînin’

Meclisa Sivîl a Reqayê û rûspiyên êlên Reqayê teqez kir ku ew li hember gefên Erdogan li ser herêmên ewle yên Bakurê Sûriyê bê deng namînin.

13 kanûn, 2018 14:00

REQA

Meclisa Sivîl a Reqayê û rûspiyên êlên Reqayê, têkildarî gefên dawîn ên Erdogan li ser herêmên Bakurê Sûriyê daxuyaniyek da. Daxuyanî ji aliyê endamê Komîteya Dadê ya Meclisa Sivîl a Reqayê Xalid Mûse ve li eywana civînan a meclisa sivîl hate xwendin.

Di daxuyaniyê de hate gotin ku daxuyaniyên Erdogan di çarçoveya siyaseta dijminahiiyê ya ku hikumeta Tirk li dijî Sûriyê bi kar tîne de ne û armanc jê dirêjkirina êşa Sûriyê ye û pêkanîna berjewendiyên xwe yên li dijî berjewendiyên gelê Sûriyê ne.

Di daxuyaniyê de hate teqezkirin ku divê dewletên cîhanê û di serî de Neteweyên Yekbûyî li hemberî êrîşên dijminahî yên Tirkiyeyê li ser herêmê bi erka xwe rabin û wiha hate dewamkirin: “Em li hember gefên Erdogan li ser herêmên ewle yên Bakurê Sûriyê bê deng namînin û em ê bihêlin ku bi awayekî têkçûyî ji herêmê derkeve, ji ber ku em parastina dozeke adil dikin. Ev doz a vî gelî ye ku bi azadî û rûmetê bawer in.”

(kc)

ANHA