Bi boneya 25'ê Mijdarê li Serêkaniyê civîn

HESEKÊ

Kongreya Star civînek li salona şehîdan a bajarê Serêkaniyê li dar xist. Endamên saziyên sivîl û şêniyên Serêkaniyê tev li civînê bûn.

Civîn bi deqeyeke rêzgirtinê dest pê kir. Piştre Endama Koordînasona Giştî ya Kongreya Star ya Kanotna Hesekê Zeyneb Şîtka axivî û behsa zilma ku li ser jinan bi rêya kevneşopên civakî û êşîrî tê meşandin, kir û bi taybet di navbera jin û mêran de.

Zeyneb Şîtka wiha got: “Dema em behsa jinan dikin, wê demê em behsa têkoşîn û berxwedana bidawîkirina tundiya li dijî jinan dikin. Tundî ne tenê tundiya bedenî ye, lê belê tundiya aborî, siyasî û civakî ye."

Zeyneb destnîşan kir ku şoreşa Rojava roleke girîng di pêşxistina jinan de, di hemû warên siyasî, leşkerî û rêveberî de lîstiye.

Zeyneb Şêtka di berdewama axaftina xwe de bal kişand ser hevjiyana azad di navbera her du zayendan de û got hevjiyana azad bi xwe re jiyana civakî ya hevpar û temamkirî ava dike. Zeyneb di dawiyê de rola jinên Ereb, Kurd û Suryan di şoreşa Rojava de tekez kir û diyar kir ku jinan asta berxwedana xwe di hemû waran de bilind kiriye û rola xwe di hemû waran de li Bakurê Sûriyeyê xurt kiriye.

Civîn bi nîqaşên li ser rêbazên rêgirtina li ber tundiya li ser jinan bi dawî bû.

ANHA