‘Bi giyanê şehîdan em dagirkeriyê têk bibin‘

 KOBANÊ – 5‘emîn Konferansa Malbatên Şehîdan a Kantona Kobanê bi nirxandina xebatên meclîsê didome.

Di Konferansê de, piştî axaftina Îlham Ehmed, ji fermandarên QSD‘ê Rêzan Efrîn, Hevserokê Rêveberiya Xweseriya Demokratîk a Kantona Girê Spî Hemdan El-Ebid, endama Kongreya Star Semîra Ehmed, endamê Meclîsa Malbatên Şehîdan a Herêma Cizîrê Mihemed El-Xetîb axivîn.

Kesên axivîn diyar kirin ku "Mîraseyê ku şehîdan ji bo jiyaneke bi rûmet li pey xwe hiştine, bi gotinan nayê wesif kirin. Bi giyanê şehîdan em ê hêzên dagirker û komên çete di xaka xwe de têk bibin."

Di axaftinan de bal hate kişandin ser êrîşên dagirkeriya Tirkiyê yên li ser Efrînê û ev tişt hatin gotin, "Dewleta osmaniyan bi dijminahiya xwe ya ji bo kurdan tê naskirin. Dewleta Osman bi navê Islamê gelê Kurd qir dikir û kurd dikuştin û mal û milkên wan wêran û talan dikir. Kiryarên wan ji rastiya islamê dûr in."

Axaftivanan soza şopandina xeta şehîdan dûbare kirin.

Her wiha, peyamên pîrozbahiyên yên Saziya Malbatên Şehîdan a Wargeha Rustem Cûdî ya Mexmûr, Saziya Malbatên Şehîdan a Başûrê Kurdistanê, komîteyên meclîsên malbatên şehîdan ên Minbic, Tebaq, Desteya Parastinê ya Kantona Kobanê, Partiya Yekîtiya Demokratîk (PYD) hatin xwendin.

Paşê jî, rapora xebatên du salan a Meclîsa Malbatên Şehîdan a Kantona Kobanê hatin xwendin.

Konferans bi nirxandina xebatên meclîsê didome.

(bb)

ANHA