Xelkê Til Birakê bi meşekê piştgirî da QSDˈê

Meclisa bajarê Til Birakê yê kantona Cizîrê bi armanca şermezarkirina êrişên dewleta Tirk a dagirker ên li ser Bakur û Rojhilatê Sûriyeyê û nîşandana piştevaniya xwe bi QSDˈê re meşek li dar xist. Bi sedan şêniyên bajar, xwendekar, mamoste, enamên saziyên sivîl û partiyên siyasî beşdarî meşê bûn. Di dema meşê de dikan hatin girtin.

Girse ji deriyê rojava yê têketina bajar dest pê kir. Di meşê de alên QSDˈê hatin hildan û pankartên bi nivîsên "Na ji êrişên dewleta Tirk a dagirker re" hatin vekirin. Bê navber jî dirûşmên silavkirina berxwedana QSDˈê hatin berzkirin.

Meş li pêşiya avahiya Hêzên Ewlekariya Hundirîn veguherî mîtîngê û deqeyeke rêz hat girtin. Li vir endama Komeleya Perwerdeyê ya Til Birakê Lema El Hesen axivî.

Lema El Hesen êrişên dewleta Tirk a dagirker şermezar kirin û got: "Her roj dewleta Tirk a dagirker hovîtiya xwe nîşan dide. Bi çekên giran, bi balafirên şer û yên bê mirov êrişî sivlan dike û li Bendava Şehîdan bi dehan komkujî li dijî sivîlan kirine."

Lema El Hesen bêdengiya hêzên navneteweyî ya li hemberî dewleta Tirk a dagirker jî şermezar kir û bi van gotinan berxwedana QSDˈê silav kir "Ji bo em bi aştî û aramî bijîn, QSDˈê li hemberî êrişên dewleta Tirk a dijmin berxwedaneke efsanewî raber dike. Divê em xwedî li hêzên xwe derbikevin û bi hemû awayan piştevaniya wan bikin."

Mîtîng bi berzkirina dirûşmên silavkirina QSDˈê bi dawî bû.

(bb)

ANHA