Têkildarî yekitiya nîştimanî ya Kurdî li Amûdê panel

Partiya Demokrat a Pêşverû ya Kurd li Sûriyeyê û Partiya Demoqrat a Kurd li Sûriyeyê ji bo nîqaşkirina geşedanên herêmê û girîngîdayîna yekrêziya Kurdî paneleke diyalogê li stadyûma Şermola ya bajarê Amûdê li dar xist.

Di panelê de nûnerên partiyên siyasî, şêniyên bajêr, rewşenbîr û rûspiyên eşîran beşdar bûn.

Nûnerê Partiya Demokrat a Pêşverû ya Kurd li Sûriyeyê Ehmed Silêman û endamê Komîteya Navendî ya partiyê Masûm Şukrî panel bi rê ve bir.

Di panelê de mijara yekê ya rewşa Sûriyeyê piştî ketina rejîma dîktator û mijara duyê ya pêşeroja gelê Kurd li Sûriyeyê û tevgera wî ya siyasî hatin nîqaşkirin.

Ehmed Silêman diyar kir ku niha ji bo yekbûna partiyên Kurdî firseteke dîrokî ye û çarenûsa wan jî bi vê yekbûnê ve girêdayî ye.

Silêman berxwedana şervanan li eniyan û fedakariya şehîdan silav kir û banga yekbûn û hevgirtinê li partiyan kir.

Masûm Şukrî jî destnîşan kir ku gelê herêmê fedakariya hêzên di eniyên şer de ji bîr nake û bang li partiyên siyasî kir ku yekrêziyê ava bikin, da ku di pêvajoya avakirina Sûriyeya pêşerojê de beşdar bin.

Piştre beşdaran di nîqaşên xwe de girîngî da yekrêziya Kurdî û destekdayîna Hêzên Sûriya Demokratîk (QSD).

(mh/fr)

ANHA