Şêniyên Kobanê şehîd Îbrahîm Îbrahîm oxir kir

Şêniyên kantona Firatê şehîd Îbrahîm Îbrahîm li Pakrewangeha Şehîd Dîcle ya li Kobanê oxir kir.

ROJANE

13 ÇILE, 2024 15:07

KOBANÊ

Endamê Hêzên Ewlekariya Hundirîn Îbrahîm Îbrahîm roja pêncşemê li bajarê Tebqayê şehîd bûbû.

Bi sedan şênî, endamên saziyên Rêveberiya Xweser, partiyan li kantona Firatê tev li merasîma oxirkirina şehîd Îbrahîm Îbrahîm bûn ku li Pakrewangeha Şehîd Dîcle hat lidarxistin.

Di merasîmê de endamê rêveber ê Ewlehiya Bendên Kontrolê ya Hêzên Ewlekariya Hundirîn Ebdullah Reşîd li ser kesayeta şehîd axivî û got şehîd Îbrahîm bi ax û doza xwe ve girêdayî bû, soz dabû ku ewlehiya herêmê biparêze.

Endama Meclisa Jinan a Meclisa Malbatên Şehîdan Şîrîn Hesê jî destnîşan kir ku gelên herêmê bi saya fedakariyên şehîdan xwedî vîn in. Şîrîn Hesê çalakiyên gerîla yên li dijî artêşa Tirk a dagirker jî silav kirin.

Di dawiya merasîmê de wesîqeya şehadetê ya şehîd hate xwendin û radestî malbatê hate kirin. Dûre girseyê cenazeyê şehîd spart axê.

Piştî merasîmê şênî ber bi gundê Baxdik ve bi rê ket, ji bo ku sersaxiyê bidin malbata şehîd.

(şx)

ANHA