Rûspî: Divê diyalogeke ku tevahî sûriyeyî cihê xwe tê de digirin çêbe

Duh li bajarê Qamişlo Meclisa Qebîleya Tey a Ereb civîneke diyalogê li Hola Efrîn a Qamişloyê bi dirûşma “Sûriye me di nava rastî û hêviyan de tîne gel hev" li dar xist. Di civînê de rûspî, serokeşîrên Kurd û Ereb û rewşenbîr amade bûn.

Têkildarî vê yekê rûspiyên Kurd û Ereb ji ajansa me re axivîn. Rûspiyan got civîna diyaloga nîştimanî ya li Şamê ne li gorî hêviyên gelê Sûriyeyê bû.

Ji qebîla Tey a Ereb şêx Samir El Teyî diyar kir ku divê diyalogeke nîştimanî ku her netewe cihê xwe tê de bigire, were lidarxistin. Samir El Teyî got: “Ew diyaloga ku li Şamê hat lidarxistin, paşguhkirineke li hember gelên Kurd, Ereb û Suryan e. Di dawiyê de em sûriyeyî ne, bi tu awayî diyalogeke vî rengî qebûl nakin.”

Şêx Samir El Teyî got: “Kurd û Ereb bi salan e ku bi hev re dijîn, gelek hewldan çêbûn ku di navbera me de tevliheviyê derxin, lê ev yek pêk nehat û dê neyê kirin. Em dixwazin diyalogeke ku hemî ol û neteweyên li Sûriyeyê tê de bin, were pêkanîn.”

Endamê Meclisa Eşîran a Kurdî Ebdillqadir Otê jî destnîşan kir ku diyaloga ku hat kirin tu temsîliyeta gelê Sûriyeyê nake, hin kesan li gorî xwe hazir kir û li hev rûniştine û wiha dom kir: "Ew rûniştina ku li Şamê kirin, em bi tu awayî navê diyalogê lê nakin. Ew civîn bi destê dewleta Tirk a dagirker hatiye kirin, ji ber kesê ku lê hazir bûn, nayên naskirin."

Ebdilqadir Otê di dawiyê de got divê diyalogên ku mafên hemû gelan lê hebin bê lidarxistin.

ANHA