Meclisa Malbatên Şehîdan têkildarî dîlgirtiyan daxuyanî da

Meclisa Malbatên Şehîdan a Kobanê ji bo dîlgirtî û cenazeyên şehîdên Kobanê yên ku di destê hikumeta demkî de ne daxuyaniyek da.

ROJANE

11 adar, 2026 13:00

KOBANÊ

Meclisa Malbatên Şehîdan a bajarê Kobanê ji bo dîlgirtiyên ji aliyê hikumeta demkî ya Sûriyeyê ve hatibûn dîlgirtin, daxuyanî li Qada Jina Azad a bajarê Kobanê bi amadebûna malbatên dîlgirtiyan da.

Daxuyanî ji aliyê hevserokê meclisê Mihemed Bozî ve hate dayîn. Daxuyanî wiha ye:

“Em di pêvajoya aştî û aramiyê de ne. Em ji gelê cîhanê re radigihînin ku em girtiyên xwe dixwazin, bila girtiyên me vegerin bajarê xwe û malbatên xwe. Bi sedan girtiyên me hene, lê heta niha girtiyên me nehatine berdan. Ev pêvajo wê bi berdana êsîrên me were çareserkirin û wê bibe rakirina dopêça li ser Kobanê. Di van rojên Remezanê de em dixwazin hemû êsîrên me vegerin malbatên xwe û van rojên pîroz di nav malbata xwe de bin.

Em dixwazin êsîrên me beriya cejnê werin berdan û cenazeyên şehîdên me bidin me. Em li ser pêyan in û daxwaza êsîr û cenazeyên şehîdên xwe dikin.

Banga me ji saziyên mafên mirovan re ew e ku zextekê li hikumeta demkî bikin da ku êsîrên me beriya cejnê berdin û ji bo ku êsîrên me vegerin nav malbata xwe û em cenazeyên şehîdên xwe dixwazin.”

(sş/fr)

ANHA