Li Şamê ji bo qanûn û li dijî gendeliyê banga çalakiya bêdeng 

Navenda Çavdêriya Mafên Mirovan a Sûriyeyê (SOHR) daxuyand ku çalakvan û ciwanên Sûriyeyî bang kir ku di 17ˊê Nîsanê de saet 14.00ˊan li meydana sereke ya Şamê, bi diruşma "qanûn û rûmetê" çalakiyeke bêdeng were lidarxistin.  

Armanca çalakiyea bêdeng daxwaza serweriya qanûnê, redkirina gendeliyê û avakirina dewleteke sivîl a ku bi serweriya qanûnê tê rêvebirin e, rêz li welatiyan û mafên wan ên bingehîn were girtin, mafê jiyaneke birûmet ji bo hemû Sûriyeyiyan were garantîkirin û mafê wan ê jiyaneke baş, digel misogerkirina ewlehî û edaletê were tekezkirin. 

Organîzetorên çalakiya bêdeng destnîşan kir ku ev gav di demekê de tê ku zextên aborî û jiyanê yên li ser welatiyan zêde dibin. Ew çalakiya bêdeng wekî "qîrînek" li dijî biryar û polîtîkayên ku dibin sedema giranbûna êşa welatiyan e. 

SOHRˊê da zanîn ku komek ji parêzer, çalakvan û parêzvanên mafên mirovan niyeta xwe ya şopandina çalakiya bêdeng hem li ser erdê hem jî bi awayekî qanûnî ragihandin, di heman demê de ji bo belgekirina her binpêkirin an zêdegaviyên ku dibe ku bandorê li beşdaran bike dixebitin. Çalakvana da zanîn ku pêwîstî bi garantîkirina mafê derbirîna aştiyane di çarçoveya qanûnî de heye. 

Ev bang di nav nerazîbûna giştî ya berfireh de li herêmên Sûriyeyê hatin kirin, nemaze digel krîzên aborî û kêmbûna asta xizmetguzariyan û daxwazên ji bo reform û başkirina şert û mercên jiyanê. 

(fr)