Li Tişrînê biryardariya gelê ku binkeftinê napejirîne

Ji 8’ê Çileya îsal ve gelê Bakur û Rojhilatê Sûriyeyê li hemberî êrişên dagirkirinê yên dewleta Tirk û çeteyên wê çalakiya nobetê li Bendava Tişrînê bi rêxistin kiriye.

Gelê herêmê ku li gorî koman nobeta parastina bendavê bi rêxistin kiriye, bi israr e ku armanca xwe ya parastina bendavê û rawestandina êrişên dewleta Tirk ên li ser ewlehiya av, xurek û enerjiyê bigihîne serî.

Bendava Tişrînê yek jî tesîsên girîng li Bakur û Rojhilatê Sûriyeyê ye ku roleke bingehîn di dabînkirina avê de dilîze. Her wiha bendav stasyonên hilberandina ceyranê dixebitîne.

Ji dema ku bendav bûye hedefa dewleta Tirk a dagirker û çeteyên wê ve, gelê herêmê parastina wê wek erkeke exlaqî û mirovî dibîne. Şêniyan di rêya parastina bendavê de gelek şehîd dane û diyar dikin ku ew amade ne hîna jî berdêlan bidin. Her wiha aşkera dikin ne mumkin e bazar li ser bendavê were kirin, lê parastina wê berpirsyariya her kesî dibînin.

Bi vê yekê berxwedana gelê Bakur û Rojhilatê Sûriyeyê ku bûye efsaneyeke biryardariya gel a li hember alava şer a dewleta dagirker. Bendava Tişrînê jî şahidiyê ji berxwedana gelekî re dike ku serîtewandinê qebûl nake, lê îsbat dike ku bêyî berxwdanê maf nayên bidestxistin.

(bb)

ANHA