Li Til Rifetê li dijî tecrîdê meşiyan

Koçberên Efrînê û şêniyên Şehbayê ji bo şermezarkirina tecrîda li ser Rêber Abdullah Ocalan li Til Rifetê meşek li dar xist.

ROJANE

9 gulan, 2024 15:26

ŞEHBA

Meclisa bajarê Til Rifetê ya kantona Şehbayê ji bo şermezarkirina tecrîda li ser Rêber Abdullah Ocalan meşek li dar xist. Bi sedan koçberên Efrînê û şêniyên Til Rifetê tev li meşê bûn.

Girseya gel wêneyên Rêber Abdullah Ocalan, pankartên"Azadiya fizîkî ya Rêber Apo çareseriya doza kurdî ye" hildan.

Meş li qada bajarê Til Rifetê sekinî û endamê Meclisa Malbatên Şehîdan a bajarê Til Rifetê Reşîd Fetko axivî. Fetko got: “Armaca dewleta Tirk ji tecrîda li ser Rêber Apo ew e ku gel û Rêber Apo ji hev dûr bixe. Lê em tu carî ji felsefeya Rêber Apo dûr nakevin. Ji bo azadiya fîzîkî ya Rêber Abdullah Ocalan em ê her tim li ser pêyan bin.”

Her wiha endama kongra Star a bajarê Til Rifetê Ayşe Hikmet jî got: "Komploya Navneteweyî ya li dijî Rêber Abdullah Ocalan, ji bo bêdengkirina kesê banga biratiya gelan û azadiya mirovahiyê dike, hate lidarxistin. Em ê bi fikr û felsefeya Rêber Apo tê bikoşin heta ku azadiya wî ya fîzîkî em bi dest dixin.”

Di dawiyê de girseyê sloganên "Bê Serok jiyan nabe" berz kirin.