Li Reqayê panelek li ser banga Rêber Abdullah Ocalan hat dayîn

Akademiya Abdullah Ocalan a Zanistên Civakî û Akademiya Civaka Demokratîk a kantona Reqayê paneleke diyalogê bi dirûşma "Bi nêrîna Abdullah Ocalan em aştiyê xêz dikin" li dar xistin.

Panel li hola Navenda Çand û Hunerê ya bajarê Reqayê bi amade bûna  rewşenbîr, siyasetmedar, nûnerên saziyên civaka sivîl, meclis û akademiyên fikrî yên kantonê hat lidarxistin.

Panel ji 3 mijaran pêk hat. Mijara yekê li ser komploya navneteweyî ya li dijî Rêber Abdullah Ocalan ji aliyê hevserokê Partiya Yekitiya Demokratîk (PYD) Menaf Mûsa û rêvebera Akademiya Firatê Sîham El Mushib ve hat nîqaşkirin.

Di mijarê de armancên komployê û encamên ku jê dihatin hêvîkirin, hatin şîrovekirin.

Mijara duyê ya li ser têgîna aştiyê li gorî fikrên Rêber Abdullah Ocalan û girîngiya civaka demokratîk ji aliyê endamên Akademiya Abdulêah Ocalan a Zanistên Civakî Ayşe Çawîş û Akademiya Civaka Demokratîk Besam El Hemed ve hat nîqaşkirin.

Ayşe Çawîş diyar kir ku Rêber Abdullah Ocalan projeyeke fikrî ya ku sînorên neteweperestiyê derbas dike û edaletê ji gelan re misoger dike, pêşkêş kir.

Ayşe Çawîş got ku banga aştiyê ya Rêber Abdullah Ocalan bingeha edaleta veguhêz û bidawîkirina înkarkirina civakan danî.

Mijara sêyê ya li ser komploya parçekirina Rojhilata Navîn ji aliyê cîgirê hevserokatiya Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê Hesen Koçer ve hat nîqaşkirin.

Koçer diyar kir ku manîfestoya aştiyê neteweperestiyê red dike û projeya nenavendiyê û wekheviya jin û mêran, pêşkêş dike.

Di dawiya axaftina xwe de Koçer banga parastina sivîlan bi taybetî li Xezayê û avakirina civakeke hevgirtî, kir.

Di dawiya panelê de daxuyanî hat xwendin.

Di daxuyaniyê de banga bidawîkirina tecrîda li ser Rêber Abdullah Ocalan hat kirin.

(mh)

ANHA