Li gelek bajaran dar hatin çandin û pêşangeheke pirtûkan hat vekirin

Li bajarên Tirbespiyê, Girkê Legê, Hesekê, Zirgan û Qamişloyê bi boneya 4'ê Nîsanê rojbûna Rêber Abdullah Ocalan dar hatin çandin û pêşangeheke pirtûkan hat vekirin.

ROJANE

4 nîsan, 2026 13:49

NAVENDA NÛÇEYAN

Bi boneya 4'ê Nîsanê rojbûna Rêber Abdullah Ocalan bi driûşma "4'ê Nîsanê mîlada azadiya jinan û yekitiya demokratîk e" li bajarên Rojavayê Kurdistanê çalakî hatin lidarxistin.

TIRBESPIYÊ

Meclisa Kongra Star a bajarê Tirbespiyê bi beşdariya malbatên şehîdan û endamên saziyên sivîl dar li Parka 4'ê Nîsanê çandin.

Şaredariya Gel a Tirbespiyê jî bi boneya 4'ê Nîsanê li têketina rojavayê bajar darên serû û merxan çandin.

GIRKÊ LEGÊ

Kongra Star a bajarê Girkê Legê jî bi beşdariya endamên saziyên sivîl 77 dar (nîşana temenê Rêber Abdullah Ocalan) li gundê Hilêqêyê çandin. Beşdaran diyar kir ku çandina daran sepandina ramanên wî yên girêdayî parastina ekolojiyê ye.

HESEKÊ

Bi heman armancê Meclisa Kongra Star a bajarê Kobanê, bi tevlêbûna bi dehan şêniyan û endamên saziyên sivîl 77 dar li Parka Şehîd Azad a li ser rêya bajarokê Tiwênayê çandin.

ZIRGAN

Li bajarê Zirganê jî darên serû li Parka Jinan hatin çandin. Şêniyan jî pêngaveke paqijkirinê li kolanên sereke û yên şaxî li dar xist.

QAMIŞLO

Di çarçoveya çalakiyên bi boneya 4'ê Nîsanê de Meclisa Wêjeyê pêşangaheke pirtûkan bi rêxistin kir.

Pêşangeh li Pirtûxaneya Şilêr a li bajarê Qamişloyê hat vekirin. Derdora 35 sernavên kurdî û erebî yên pirtûkên Rêber Abdullah Ocalan hatin pêşandan.

Gelek rewşenbîr û hezkiriyên wêjeyê serdana pêşangehê kir. Pêşangeh dê heya êvarê vekirî be. Di dawiyê de dê li heman cihî şevbuhêrkeke helbestan were lidarxistin.

(bb)

ANHA