Ji merasîma oxirkirina şehîdan: Em soza bilindkirina têkoşînê didin

Girseya koçberên Efrînê û şêniyên Şehbayê cenazeya şervanê Hêzên Rizgariya Efrînê (HRE) Kemal Pîr û cenazeya welatiyê bi navê Xalid Mihemed li Goristana Şehîd Zazan Amanos oxir kirin. Her wiha ji bo gerîlayê HPG'ê şehîd Amed Efrîn merasîmeke xiyabî hat lidarxistin.

Şervanê HRE'ê Kemal Pîr (Loqman Henan) di 7'ê Îlona 2024'an de, di qonaxa duyemîn a Berxwedana Serdemê de gihişt asta şehadetê.

Şehîdê Kedê welatiyê bi navê Xalid Mihemed di 7'ê Îlonê de, di êrişa dewleta Tirk a li ser navçeya Şera de gihaşt asta şehadetê.

Gerîlayê HPG'ê Amed Efrîn (Zekî Hasan) di 20'ê Tîrmehê de, li Xakurkê tevlî nava kerwanên şehîdan bû.

Koçberên Efrînê û şêniyên Şehbayê cenazeya şehîd Kemal Pîr û welatiyê Xalid Mihemed ji Nexweşxaneya Avrîn wergirtin û ber bi Goristana Şehîd Zozan Amanos ve bi rê ketin.

Li wir endama Meclisa Malbatên Şehîdan Hacer Hisên sersaxî da malbatên şehîd û tevahî gelê Kurdistanê û got: "Eger gerîlayek me şehîd bikeve bi sedan keç û xortên me tev li nava refên azadiyê dibin. Êdî bes e ji êrişên te re. Em ê xeta şehîdên xwe bişopînin. Em di xeta berxwedanê de bi israr bin."

Her wiha endama Komîteya Oldaran a kantona Efrîn û Şehba Mîad Reslan axivî û wiha got: "Dayê negirî, kurê te şehîd e. Kurê te şehîdê welatê xwe ye. Zarokên me ji bo parastina gel, ax û zarokên xwe canê xwe feda kirin.  Sînorê welatên me bi têlan nayê parastin bi xwîna şehîdên me tê parastin. Em ê jî li vir soza xwe nû bikin û em soza şopandina rêya şehîdan didin."

Piştre wesîqeya şehadetê hatin xwendin û radestî malbatan hate kirin. Cenazeyê şehîdan bi siloganên "Şehîd namirin" û tilîliyên dayikan hatin veşartin.

(zş)