Li Dêrazorê hewldanên pêşxistina tecrubeyên xebatkarên tenduristiyê

Komîteyên Tenduristiyê ya kantona Dêrazorê ji bo xurtkirina tecrubeyên kadroyên tenduristiyê û hemşîreyan dewreyeke perwerdeyê ji 100 xebatkarên Nexweşxaneya Giştî ya El Kesra re vekir. Di dewreyê de bijîşkên pispor waneyan didin.

ROJANE

24 nîsan, 2024 07:35

DÊRAZOR

Dewre li hola Nexweşxaneya Giştî ya El Kesrayê hate vekirin. Dê mehekê dewam bike û wane li ser dermankirin û destwerdana lezgîn bên dayîn.

Endamê rêveberiya nexweşxaneyê Casim El Riyaş têkildarî mijarê ji ajansa me re wiha axivî: "Em dixwazin pirsporî û tecrubeyên kadroyên tenduristiyê û hemşîreyan li nexweşxaneyê xurt bikin."

El Riyaş diyar kir ku di vê dewreyê de, bijîşkên pispor waneyan didin û got: "Zêdetirî 100 kadroyên nexweşxaneyê tev li dewreyê bûne. Mijarên kardiyopolmenerî ji bo kesên temenmezin û zarokan, tedbîrên desteka pêşîn, mijarên din ên girîng ji bo pêşxistina tecrubeyên kadroyên tenduristiyê di rewşên awarte de, mijarên waneyan in."

Li gorî El Riyaş aşkera kiriye, di hefteyê de 3 semîner dê werin dayîn, dawiya perwerdeyê jî dê bawernameyan ji Komîteya Tenduristiyê wergirin. Her wiha ji vekirina dewreyên wiha jî armanc dikin ku Nexweşxaneya El Kesra veguhera saziyeke akademîk û zanistî.

Hemîşreya bi navê Hîba El Hisên a ku tev li dewreyê bûye, diyar kir ku dewre dê tecrube û pirsporiya wê û hevalên wê bi pêş bixe.

(şx)

ANHA